پاکستان ہاکی ٹیم میں کپتان کی تقرری کا معاملہ، ٹیم مینجمنٹ اختلافات کا شکار -
The news is by your side.

Advertisement

پاکستان ہاکی ٹیم میں کپتان کی تقرری کا معاملہ، ٹیم مینجمنٹ اختلافات کا شکار

کراچی: پاکستان ہاکی ٹیم کا کپتان کس کو بنایا جائے؟ اس معاملے نے ٹیم مینجمنٹ کو مشکل میں ڈال دیا، کوچ اور ہیڈ کوچ میں شدید اختلافات پیدا ہوگئے، دونوں اپنی مرضی کا کپتان لانا چاہتے ہیں۔

تفصیلات کے مطابق ایشیئن ہاکی چیمپئنز ٹرافی میں کپتان کے معاملے پر ٹیم منجمنٹ اختلافات کا شکار ہوگئی، ہیڈ کوچ حسن سردار اور ریحان بٹ گول کیپر عمران بٹ کو کپتان بنانا چاہتے ہیں جبکہ کوچ محمد ثقلین عرفان سینئر کو کپتان بنانے کے خواہشمند ہیں۔

شدید اختلافات کی بناء پر کوچ محمد ثقلین عہدے سے استعفی دینے پر غور کررپے ہیں۔ دوسری جانب کپتان رضوان سینئر بیرون ملک لیگ ہاکی کھیلنے کی وجہ سے کیمپ میں شرکت نہیں کرسکے۔

غالب امکان ہے کہ گول کیپر عمران بٹ کو کپتانی کی ذمہ داری سونپ دی جائے گی، ایشیئن ہاکی چیمپئنز ٹرافی کیلئے پاکستان ہاکی ٹیم کا تربیتی کیمپ کراچی میں جاری ہے، چیمپئنز ٹرافی18اکتوبر سے مسقط میں شروع ہوگی۔

علاوہ ازیں کپتان رضوان سینئر کا اس حوالے سے کہنا ہے کہ لاعلم ہوں کہ مجھے پاکستان ہاکی ٹیم کی کپتانی سے ہٹایا جارہا ہے، ٹیم آفیشل کے مطابق تمام خبریں بے بنیاد ہیں۔

رضوان سینئر نے کہا کہ مجھے جواز بتایا جائے اگر کپتانی سے ہٹایا جارہا ہے تو کیوں؟ میں مینجمنٹ سے این او سی لے کر ہالینڈ لیگ کھیلنے آیا ہوں۔

انہوں نے مزید کہا کہ کپتان کی تبدیلی ٹیم میں گروپ بندی کا سبب بنے گی، قیادت برقرار رہی تو ہالینڈ سے عمان ٹیم کو جوائن کروں گا۔ بہت سے ایسے فیصلے ہوئے جو قومی ہاکی ٹیم کے حق میں نہیں، ورلڈ ہاکی لیگ والا ماحول دوبارہ بنتا نظر آرہا ہے۔

Comments

comments

یہ بھی پڑھیں