لاہور: دو روزہ پاک بھارت بارڈر سیکیورٹی مذاکرات آج شروع ہونگے، بھارتی بارڈر سیکیورٹی فورس کے ڈائریکٹرجنرل کرشن کمار لاہور پہنچ گئے ہیں۔
تفصیلات کے مطابق ڈی جی بی ایس ایف کرشن کمار شرما آج صبح پنجاب رینجرز کے سربراہ میجر جنرل عمر فاروق برقی کے ساتھ ناشتہ کریں گے ، ناشتہ رینجرز ہیڈ کوارٹر لاہور میں ہوگا، تاہم مذاکرات کے لیے دونوں ممالک کی افواج کی اگلی نشست بھی اسی مقام پر منعقد کی جائے گی۔
ذرائع کے مطابق ناشتے کے بعد دو روزہ پاک بھارت بارڈر سیکیورٹی کے باضابطہ مذاکرات شروع ہونگے، مذاکرات میں کسٹمز، امیگریشن، ریلویز اور اینٹی نارکورٹکس کے نمائندگان بھی شریک ہوں گے، مذاکرات کا مشترکہ اعلامیہ 28 جولائی کو جاری کیا جائے گا۔
مزید پڑھیں : بھارتی فورسز کا وفد مذاکرات کے لیے آج پاکستان آئے گا
پاکستانی حکام کی جانب سے اجلاس کے دوران ورکنگ باؤنڈری اور کنٹرول لائن پر ہونے والی خلاف ورزیوں کے حوالے احتجاج کیا جائے گا جبکہ مذاکرات میں پٹھان کوٹ حملے کے حوالے سے کوئی بات چیت نہیں کی جائے گی، ایس ایف حکام کی جانب سے وقتاً فوقتاً بھارتی فورسز کی جانب سے ہونے والی سرحدی خلاف ورزی پر احتجاج بھی ریکارڈ کروایا جائے گا۔
گزشتہ روز پاک بھارت سرحدی فورسز کے مذاکرات میں شرکت کے لیے 21 رکنی بھارتی وفد واہگہ کے راستے پاکستان پہنچا تھا۔
