اسلام آباد: سعودی عرب کے ولی عہد محمد بن سلمان کے دورہ پاکستان کی مناسبت سے وفاقی دارالحکومت میں تصویری نمائش کا انعقاد کیا گیا۔
نمائندہ اے آر وائی عاصم علی رانا کے مطابق اسلام آباد کے مقامی ہوٹل میں منعقد ہونے والی تصویری نمائش کا افتتاح چیئرمین سینیٹ صادق سنجرانی نے کیا، تصویری نمائش میں پاکستان اور سعودی عرب کے تاریخی دوستانہ تعلقات کی منظر کشی کی گئی ہے۔
چیئرمین سینیٹ اور سعودی عرب کے سفیر نواف سعید المالکی نے تصویری نمائش دیکھی اور مسرت کا اظہار کیا۔
چیئرمین سینیٹ کا میڈیا سے گفتگو کرتے ہوئے کہنا تھا کہ ’سعودی ولی عہد کے دورہ پاکستان سے پاک سعودی تعلقات کی نئی راہیں کھلیں گی، سعودی عرب کی سرمایہ کاری سے ہماری معیشت مزید مضبوط و مستحکم ہوگی‘۔
اُن کا کہنا تھا کہ سعودی عرب مسلم ممالک کا ہیڈ کوراٹر (مرکز) کہلاتا ہے، سعودی حکومت نے ہمیشہ ہر مشکل میں مسلمان ممالک اور بالخصوص پاکستان کے ساتھ بڑھ چڑھ کر تعاون کیا۔
اس موقع پر سعودی سفیر کا کہنا تھا کہ ’محمد بن سلمان کے دورے سے دونوں ممالک کے درمیان تعلقات کو مزید تقویت اور مختلف شعبوں میں تعاون کو فروغ ملے گا‘۔
چیئرمین سینیٹ کا کہنا تھا کہ خطے کی بہتری کے لیے دونوں ممالک ایک دوسرے سے تعاون کر سکتے ہیں، سعودی شوریٰ کے وفد کو پاکستان کے دورے کی دعوت دی۔
انہوں نے مزید کہا کہ ہمیں اسلامی فوجی اتحاد کے قیام کو سراہنا چاہیے، سعودی عرب نے اس کی شروعات کی۔ ’ہمیں امید ہے باہمی تعلقات مزید مستحکم ہوں گے‘۔
یاد رہے کہ سعودی ولی عہد محمد بن سلمان 16 فروری کو پاکستان پہنچیں گے، اس ضمن میں اُن کی سیکیورٹی پر تعینات 123 شاہی محافظ پاکستان پہنچ گئے۔
شاہی محافظ ولی عہد کی سیکیورٹی پر مامور رہیں گے اور اسلام آباد کے 8 ہوٹلوں کی نگرانی بھی کریں گے۔ وزیراعظم ہاؤس اور 8 نجی ہوٹلوں کی سیکیورٹی سخت کی جائے گی اور 300 سے زائد گاڑیاں شاہی خاندان کے زیراستعمال رہیں گی۔
قبل ازیں سعودی سفارت خانہ کی جانب سے بیان میں کہا گیا تھا ولی عہد محمد بن سلمان 16 سے 17 فروری تک پاکستان کا دورہ کریں گے، اس دوران دونوں ممالک کے درمیان 20 ارب ڈالر کے مختلف معاہدے بھی ہوں گے۔
ویڈیو دیکھیں
