آخری ٹی ٹوئنٹی، پاکستان نے جنوبی افریقا کو شکست دے دی -
The news is by your side.

Advertisement

آخری ٹی ٹوئنٹی، پاکستان نے جنوبی افریقا کو شکست دے دی

سنچورین: پاکستان نے آخری ٹی ٹوئنٹی میچ میں جنوبی افریقا کو 27 رنز سے شکست دے دی۔

تفصیلات کے مطابق پاکستان اور جنوبی افریقا کی ٹیموں کے درمیان سنچورین کے اسٹیڈیم میں سیریز کا آخری ٹی 20 میچ کھیلا گیا، جنوبی افریقا کی ٹیم کے کپتان ڈیوڈ ملر نے ٹاس جیت کر شعیب ملک کو پہلے بیٹنگ کی دعوت دی۔

مہمان ٹیم کی دعوت پر پاکستان نے بیٹنگ کا آغاز کیا تو بابر اعظم اور فخر زمان نے اننگز کا آغاز کیا، قومی ٹیم کو ایک بار پھر اوپننگ اچھی نہ مل سکی اور پہلے کھلاڑی بابر اعظم 24 کے مجموعی جبکہ 23 کے انفرادی اسکور پر کیچ آؤٹ ہوکر پویلین لوٹے۔

قومی کرکٹ ٹیم کا کوئی بھی کھلاڑی زیادہ دیر وکٹ پر نہ ٹک سکا اور وکٹیں گرنے کا سلسلہ جاری رہا۔ پاکستان کی جانب سے محمد رضوان 26 ، آصف علی 25، بابر اعظم 23 اور شاداب خان 22 رنز ناٹ آؤٹ کے ساتھ نمایاں بلے باز رہے۔

اسکور کارڈ

آل راؤنڈر شاداب خان نے 8 گیندوں پر 3 چھکوں کی مدد سے 22 رنز اسکور کیے جبکہ جنوبی افریقا کی جانب سے بیورن ہینڈرکس نے چار اوورز میں چودہ رنز دے کر 4 کھلاڑیوں کو پویلین کی راہ دکھائی جبکہ مورس نے 2 وکٹیں حاصل کیں۔

ہدف کے تعاقب میں جنوبی افریقا نے بیٹنگ کا آغاز کیا تو پانچ کے مجموعی اسکور پر شاہین آفریدی نے پروٹیز کے پہلے کھلاڑی کو پویلین کی راہ دکھائی، 14 کے مجموعی اسکور پر جے این ملن کو عماد وسیم نے کلین بولڈ کیا جبکہ 30 کے مجموعی اسکور پر جنوبی افریقا کی تیسری وکٹ گری۔

پاکستانی باؤلرز نے دو کے علاوہ باقی تمام افریقی بلے بازوں کو زیادہ دیر وکٹ پر ٹکنے نہ دیا۔ سی ایچ مورس نے 29 گیندوں پر 55 رنز کی ناقابل شکست اننگز کھیلی جبکہ ڈوسن 41 رنز بنا کر نمایاں بلے باز رہے۔

اسکور کارڈ

پاکستان کی جانب سے محمد عامر نے تین، شاداب خان اور فہیم اشرف نے 2 ، 2 جبکہ شاہین آفریدی اور عماد وسیم نے ایک ایک وکٹ حاصل کی۔

قومی ٹیم میں تبدیلیاں

قومی ٹیم نے وائٹ واش سے بچنے کے لیے دو تبدیلیاں کیں، فہیم اشرف اور محمد عامر پلیئنگ الیون کا حصہ ہیں دوسری جانب جنوبی افریقا کی ٹیم نے کوئی تبدیلی نہیں کی۔

اسکواڈ

پاکستان: شعیب ملک (کپتان)، فخر زمان، بابر اعظم، حسین طلعت، محمد رضوان، آصف علی، عماد وسیم، شاداب خان، فہیم اشرف، محمد عامر، شاہین شاہ آفریدی

جنوبی افریقہ: ڈیوڈ ملر (کپتان)، ریزا ہینڈرکس، جینیمان مالان، روسی فینڈر ڈوسن، ہینرچ کلاسن، اینڈائل فیلکوائیو، کرس مورس، لتھو سمپالا، بیورن ہینڈرکس، جونیئر ڈالا، تبریز شمسی

مزید پڑھیں: بہترین کھیل پیش کیا لیکن افسوس کہ ہم میچ نہ جیت سکے: شعیب ملک

پاکستان کو مختصر فارمیٹ میں صرف ایک بار انگلینڈ سے تین میچ کی سیریز میں وائٹ واش کا سامنا کرنا پڑا تھا، سنچورین میں پروٹیز تاریخ بنانے اور شاہین جیت کے لیے میدان میں اترے۔

خیال رہے کہ سیریز کے دوسرے ٹی ٹوینٹی میں قومی ٹیم 189 رنز کے تعاقب میں 7 وکٹوں کے نقصان پر 181 رنز بناسکی تھی، بابر اعظم نے 90 رنز کی برق رفتار اننگز کھیلی جبکہ حسین طلعت نے 55 رنز اسکور کیے بعد میں آنے والے بلے باز خاطر خواہ کارکردگی دکھانے میں ناکام رہا تھا۔

Comments

comments

یہ بھی پڑھیں