اسلام آباد : پاکستان اور آئی ایم ایف کے درمیان موجودہ قرض پروگرام کی دوسری قسط کے معاملہ پر مذاکرات کا آغاز اکتوبر کے آخری ہفتے میں ہونے کا امکان ہے۔
تفصیلات کے مطابق عالمی مالیاتی فنڈ (آئی ایم ایف) کے موجودہ قرض پروگرام کی دوسری قسط کے معاملے پر پاکستان کے آئی ایم ایف کےساتھ مذاکرات اکتوبر کے آخری ہفتے میں ہونے کا امکان ہے، آئی ایم ایف کا وفد اکتوبر کے آخری ہفتے میں پاکستان آئے گا۔
ذرائع نے بتایا کہ فیڈرل بورڈ آف ریونیو سے آئی ایم ایف کی آن لائن میٹنگ ہوئی ، جس میں پاکستان نے آئی ایم ایف کو واضح کیا کہ نگران حکومت کوئی نیاٹیکس نہیں لگائےگی، ایف بی آر کوئی نیا ٹیکس لگائے بغیر ٹیکس ہدف حاصل کرنے کیلئے پرعزم ہے۔
ذرائع کا کہنا تھا کہ ایف بی آر کی کارکردگی سے آئی ایم ایف مطمئن ہے، آئی ایم ایف کو اکتوبر کے پہلے ہفتے میں معاشی کارکردگی اور رواں مالی سال جولائی تا ستمبر محصولات کا ڈیٹاپیش کیا جائے گا۔
ذرائع کے مطابق ٹیکس چوروں کیخلاف کارروائیوں کے پلان سے بھی آئی ایم ایف کو آگاہ کردیا گیا ہے۔
