کراچی: پاکستان کی ہوا بازی کی صنعت کے لیے اچھی خبر ہے کہ یورپی یونین کے بعد برطانیہ کی پروازیں کھلنے کی بھی راہ ہموار ہو گئی ہے۔
ڈی جی سول ایوی ایشن نادر شفیع ڈار کے مطابق برطانوی محکمہ ٹرانسپورٹ ڈی ایف ٹی کا وفد اگلے ماہ پاکستان آئے گا، رواں ماہ دسمبر کے تیسرے ہفتے میں بھی ایک آن لائن میٹنگ شیڈول ہے۔
ڈی جی کے مطابق جنوری میں برطانوی دورہ شیڈول ہے، اس دورے سے واپسی پر چند ہفتوں میں برطانیہ کی پروازیں بھی کھلنے کی امید ہے، امکان ہے کہ برطانیہ کی لیے پروازیں مارچ سے شروع ہو جائیں گی۔
انھوں نے کہا یورپی یونین نے جو ہماری ویلیویشن کی ہیں، ان ہی خطوط پر برطانوی بھی ہماری اسسمنٹ کریں گے، یورپی یونین میں ہمارے بہت اچھے نتائج ہیں، امید ہے کہ جلد برطانیہ کی پروازیں بھی شروع ہو جائیں گی۔
ترجمان پی ائی اے کے مطابق پاکستان سے برطانیہ کے لیے ہفتہ وار 21 پروازیں چلائی جاتی تھیں، لندن کے لیے 10 پروازیں جب کہ مانچسٹر کے لیے 9 اور برمنگھم کے لیے 2 پروازیں چلائی جاتی تھیں۔ یورپ اور برطانیہ کی پروازیں کھلنے سے قومی ایئر لائن کے ریونیو میں زبردست اضافے کا امکان ہے۔
