جنیوا: پاکستان نے اقوام متحدہ کے انسانی حقوق کونسل میں بھارت کے آرٹیکل 370 ختم کرنے کے غیر قانونی اقدام کو چیلنج کر دیا ہے۔
تفصیلات کے مطابق بھارت کی جانب سے مقبوضہ کشمیر کی خصوصی حیثیت ختم کرنے کا اقدام پاکستان نے انسانی حقوق کے یو این کونسل میں چیلنج کر دیا۔
پاکستان کا مؤقف ہے کہ بھارت کا اقدام اقوام متحدہ کی قرار داد کی روح کے منافی ہے، بھار ت کا یک طرفہ فیصلہ غیر قانونی اور غیر آئینی ہے۔
اقوام متحدہ میں پاکستانی مندوب طاہر اندرابی کا کہنا ہے کہ بھارتی فیصلے سے بر صغیر کے لیے تباہ کن نتائج رونما ہوں گے، ہم ہر فورم پر اس بھارتی فیصلے کو چیلنج کریں گے۔
واضح رہے کہ بھارت نے آئین کے آرٹیکل 370 کو ختم کر کے مقبوضہ کشمیر کی خصوصی حیثیت ختم کر دی ہے، بھارتی صدر نے آج باقاعدہ طور پر خصوصی شق ختم کرنے کے بل پر دستخط کیے۔
یہ بھی پڑھیں: بھارت نےمقبوضہ کشمیرکی خصوصی حیثیت ختم کردی
بھارتی پارلیمنٹ میں مقبوضہ کشمیر سے متعلق آرٹیکل 370 کی ایک کے سوا تمام شقیں ختم کی گئی ہیں، اب غیر مقامی افراد مقبوضہ کشمیر میں سرکاری نوکریاں حاصل کرسکیں گے۔
خیال رہے آرٹیکل 370 مقبوضہ کشمیر کو خصوصی درجہ دیتے ہوئے کشمیر کو بھارتی آئین کا پابند نہیں کرتا، مقبوضہ کشمیر جدا گانہ علاقہ ہے، جسے اپنا آئین اختیار کرنے کا حق حاصل ہے۔
ادھر صدر مملکت عارف علوی نے مقبوضہ کشمیر کی صورت حال اور بھارت کی جانب سے حالیہ فیصلے کا جائزہ لینے کے لیے پارلیمنٹ کا مشترکہ اجلاس طلب کر لیا ہے، اجلاس کل صبح 11 بجے پارلیمنٹ ہاؤس میں ہوگا۔
