The news is by your side.

چینی تاجروں کا دھابیجی اکنامک زون میں اظہار دلچسپی

کراچی : عوامی جمہوریہ چین کے کمرشل و اکنامک قونصلر یانگ گوانگ یوان نے کہا ہے کہ چین اور پاکستان کے برآمد کنندگان و درآمد کنندگان کے درمیان تاجر اتحاد کا انعقاد کرنے کے لیے کام جاری ہے۔

ان خیالات کا اظہار انہوں نے کراچی چیمبر آف کامرس اینڈ انڈسٹری (کے سی سی آئی) کے دورے کے موقع پر اجلاس سے خطاب کرتے ہوئے کیا جس میں کے سی سی آئی کے صدر محمد طارق یوسف، سینئر نائب صدر توصیف احمد، نائب صدر محمد حارث اگر اور دیگر بھی موجود تھے۔

انہوں نے کہا کہ اس اتحاد کا مقصد دونوں دوست ممالک کے تاجروں کو سہولیات فراہم کرنا ہے کہ تاکہ وہ ایک دوسرے کے ساتھ معلومات کا تبادلہ کرسکیں۔ ان کا کہنا تھا کہ 20 سے زائد چینی تاجر اتحاد میں شامل ہونا چاہتے ہیں۔

کمرشل قونصلر نے کہا کہ دھابیجی اسپیشل اکنامک زونز یک پرکشش منصوبہ ہے، اس منصوبے کے حوالے سے ایک تھنک ٹینک اور چین کی مختلف کمپنیوں نے اس بات کا جائزہ لیا ہے کہ چینی کمپنیاں دھابیجی اسپیشل اکنامک زونز میں کیسے اور کیا کام کرسکتی ہیں۔

اجلاس سے خطاب کرتے ہوئے صدرکراچی چیمبر طارق یوسف نے کہا کہ پاک چین دوستی کو صنعتی شراکت داری میں بدلنے کی ضرورت ہے، دونوں ممالک کے برآمد کنندگان ودرآمد کنندگان کے درمیان اتحاد کیلئے کوششیں کی جارہی ہیں۔

طارق یوسف نے کہا کہ چین کی مجموعی درآمدات میں پاکستان کاحصہ ایک فیصدسےبھی کم ہے، چینی تاجر برادری کو پاکستان میں مصنوعات کی تیاری کیلئے منصوبوں پر غور کرنا چاہیے۔

Comments

یہ بھی پڑھیں