اسلام آباد: پاکستان نے افغانستان میں دہشت گرد حملے کی شدید مذمت کرتے ہوئے کہا ہے کہ پاکستان ہر طرح سے دہشت گردی کی مذمت کرتا ہے۔
تفصیلات کے مطابق ترجمان دفتر خارجہ نے کہا ہے کہ افغانستان میں دہشت گرد حملہ نائب صدارتی امیدوار امراللہ صالح پر کیا گیا، پاکستان دہشت گرد حملے کی مذمت کرتا ہے۔
دفتر خارجہ کے ترجمان نے کہا کہ پاکستان افغانستان میں جمہوری عمل کی بھرپور حمایت کرتا ہے، پاکستان افغانستان میں امن کے لیے افغان بھائیوں کے ساتھ کھڑا ہے۔
واضح رہے کہ آج افغانستان کے دار الحکومت کابل میں ایک کار بم دھماکے اور فائرنگ کے نتیجے میں دو افراد ہلاک اور 25 افراد زخمی ہو گئے ہیں۔
یہ بھی پڑھیں: افغانستان، قندھار میں پولیس ہیڈ کوارٹر پرطالبان کا حملہ، 12 افراد ہلاک
افغان حکام کا کہنا ہے کہ دہشت گردوں نے نائب صدارتی امیدوار امراللہ صالح کو ان کے دفتر میں نشانہ بنایا، دہشت گرد بھاری اسلحے سے لیس تھے۔
نیوز رپورٹس کے مطابق دہشت گردوں نے افغان خفیہ ایجنسی کے سابق سربراہ امراللہ صالح کی سیاسی تحریک افغانستان گرین ٹرینڈ کے دفتر پر حملہ کیا تھا، وہ موجودہ صدر اشرف غنی کے ساتھ نائب صدر کے منصب کے لیے امیدوار ہیں۔
My brother, true son of the Afghan soil and first VP candidate of my electoral team, @AmrullahSaleh2 has survived a complex attack by enemies of the state. We are relieved and thank the almighty that attack has failed.
— Ashraf Ghani (@ashrafghani) July 28, 2019
بتایا گیا ہے کہ یہ واقعہ صدر اشرف غنی اور امراللہ صالح کی کابل میں ایک انتخابی ریلی میں شرکت کے چند گھنٹے بعد پیش آیا۔
حملے میں پہلے ایک گاڑی میں نصب دھماکا خیز مواد کو بموں سے اُڑایا گیا جس کی آڑ میں خود کش بمبار دفتر میں داخل ہو گئے تاہم سیکورٹی اہل کار موقع پر پہنچ گئے اور عمارت کو گھیرے میں لے کر حملہ آوروں کے خلاف کارروائی شروع کی۔
صدر اشرف غنی نے ایک ٹویٹ میں کہا ہے کہ امراللہ صالح ملک دشمن دہشت گردوں کے حملے میں محفوظ رہے ہیں، اللہ کا شکر ہے کہ دہشت گردوں کا حملہ ناکام ہوا۔
