اسلام آباد : دفترخارجہ کا کہنا ہے کہ پاکستان افغانستان کے دارالحکومت کابل میں دہشت گردحملوں کی سختی سے مذمت کرتا ہے۔
تفصیلات کےمطابق دفترخارجہ کے ترجمان نفیس زکریا کا کہنا ہے کہ پاکستان کابل میں سخی مزار اور چریار مسجد پر دہشت گرد حملوں کی شدید مذمت کرتا ہے۔
دفترخارجہ کی جانب سے جاری بیان میں ترجمان نفیس زکریا کا کہناتھا کہ افغانستان کے دارالحکومت کابل میں دہشتگردحملوں میں جاں بحق ہونے والوں کے لواحقین سے پاکستان گہری تعزیت کرتا ہےاور ہماری ہمدردیاں لواحقین کے ساتھ ہیں۔
ترجمان دفترخارجہ نفیس زکریا کا کہنا تھا کہ پاکستان ایک بار پھر ہر طرح کی دہشت گردی کی مذمت کرتا ہے۔
مزید پڑھیں:کابل : خود کش حملے میں 14 افراد جاں بحق 24 سے زائد زخمی
یاد رہے کہ گزشتہ روز افغانستان کے دارالحکومت میں مزار پر حملے میں 14افراد مارے گئے جبکہ 24 افراد زخمی ہوئے تھے۔سیکیورٹی فورسز نے تین حملہ آوروں کو موت کے گھاٹ اتار دیا تھا۔
واضح رہےکہ افغان وزارت داخلہ کا کہنا تھا کہ مزار کو تباہ کرنے والے حملہ آوروں نے فوجی وردیاں پہن رکھی تھیں۔
