اسلام آباد: وزیراعظم کے معاون خصوصی برائے صحت ڈاکٹر ظفر مرزا نے کہا ہے کہ حکومت معاشرے کے مستحق افراد کو صحت کارڈ فراہم کررہی ہے۔
تفصیلات کے مطابق معاون خصوصی برائے صحت ڈاکٹر ظفر مرزا سے کیوبن نائب صدر ڈاکٹر رابرٹو مورالس کی ملاقات ہوئی جس میں شعبہ صحت سے متعلق دو طرفہ تعاون کے فروغ و باہمی دلچسپی کے امور پر تبادلہ خیال کیا گیا۔
ترجمان وزارت صحت کا کہنا ہے کہ پاکستان اور کیوبا کے ڈاکٹرز و طبی عملے کا مشترکہ تربیتی پروگرام شروع کرنے پر غور کیا گیا ہے، دونوں ممالک میں شعبہ صحت میں دو طرفہ تعاون کے فروغ پر اتفاق ہوا ہے۔
ڈاکٹر ظفر مرزا نے کہا کہ پاکستان کیوبا کے ساتھ دو طرفہ تعلقات کو قدر کی نگاہ سے دیکھتا ہے۔
مزید پڑھیں: انسداد ڈینگی کیلئے مشترکہ کوششوں کے نتائج حوصلہ افزا ہیں، ظفر مرزا
معاون خصوصی برائے صحت نے کہا کہ وزیراعظم کی قیادت میں شعبہ صحت میں بڑے پیمانے پر اصلاحات جاری ہیں، حکومت پرائمری ہیلتھ کیئر سسٹم مستحکم کرنے پر توجہ دے رہی ہے۔
ڈاکٹر ظفر مرزا نے کہا کہ حکومت شہریوں تک یونیورسل ہیلتھ کوریج کی رسائی یقینی بنارہی ہے، حکومت معاشرے کے مستحق افراد کو صحت کارڈ فراہم کررہی ہے، اسلام آباد میں ماڈل ہیتلھ کیئر سسٹم متعارف کرایا جارہا ہے۔
واضح رہے کہ گزشتہ روز ڈاکٹر ظفر مرزا کا کہنا تھا کہ موثر اقدامات سے ڈینگی کی صورتحال میں نمایاں کمی آئی ہے، انسداد ڈینگی کی منصوبہ بندی پر قومی پالیسی تشکیل دی جارہی ہے، آئندہ سال پالیسی کے تحت موثر اقدامات کریں گے۔
