دیر : پاکستانی باہمت لڑکی ثمرخان نے افریقا کی بلند ترین چوٹی سَر کرنے والی پہلی خاتون سائیکلسٹ کا اعزاز اپنے نام کرلیا.
تفصیلات کے مطابق ثمر خان نے اس منفرد اعزاز کو افریقا میں واقع 5895 میٹر بلند کلیمانجارو پہاڑ کی چوٹی کو سر کرکے حاصل کیا جس پر تنزانیہ کے محکمہ سیاحت نے ایک سرکاری تقریب میں ثمرخان کو سرٹیفکیٹ سے بھی نوازا.
خیبرپختونخواہ کے علاقے دیر سے تعلق رکھنے والی نوجوان سائیکلسٹ ثمرخان یہ اعزاز حاصل کرنے والی پہلی خاتون ہیں انہوں نے چھ ہزار میٹر لمبی چوٹی 7 دسمبر 2017 کو سَر کی.
یاد رہے کہ ثمرخان قراقرم میں گلیشئر پر بھی سائیکلنگ کرنے والی واحد خاتون ہیں جنہوں نے کئی مقامی ریکارڈ اور اعزازات اپنے نام کر رکھے ہیں تاہم وسائل کی کمی کی وجہ سے بین الااقوامی مقابلوں میں شرکت نہیں کر پارہی تھیں.
اسی سے متعلق : سائیکل پراسلام آباد سے خنجراب تک کا سفر طے کرنے والی قوم کی باہمت بیٹی
آرمی چیف قمر جاوید باجوہ کو جب اس بہادر سائیکلسٹ کے عزائم کا پتہ چلا تو انہوں نے ثمرخان کو ہر قسم کے وسائل مہیا کرنے اور ایونٹ میں شرکت کے انتظامات پاک فوج کی جانب سے کرانے کی یقین دہانی کرائی تھی.
پاک فوج کی جانب سے وسائل کی فراہمی اور اعانت کے بعد ثمر خان نے تنزانیہ کا دورہ کیا اور چوٹی سر کرنے کے اعزاز کے ساتھ بہ خیریت پاکستان واپس پہنچ چکی ہیں.
