The news is by your side.

پاکستان کا جیلوں میں قید 355 بھارتی ماہی گیروں کو رہا کرنے کا فیصلہ

اسلام آباد : پاکستان نے جذبہ خیرسگالی کے تحت  جیلوں میں قید بھارتی ماہی گیر اور شہریوں کو رہا کرنے کا فیصلہ کیا ہے، بھارتی قیدیوں کو  8 اپریل  پھر 15 اپریل ، اس کے بعد 22 اور 29 اپریل کو  رہا کیا جائے گا۔

تفصیلات کے مطابق پاکستان نے جذبہ خیرسگالی کے تحت ایک مرتبہ پھر بڑا اقدام کرتے ہوئے پاکستانی جیلوں میں قید بھارتی ماہی گیروں اور بھارتی شہریوں کو رہا کرنے کا فیصلہ کیا ہے۔

ترجمان دفترخارجہ نے کہا 355 ماہی گیر اور 5 بھارتی شہریوں کو رہا کیاجائےگا، 8 اپریل پھر 15 اپریل ، اس کے بعد 22 اور 29 اپریل کو بھارتی قیدیوں کو رہا کیا جائے گا، بھارتی شہریوں کو 100 ، 100 کر کے رہا کیا جائےگا۔

اس سے قبل ترجمان دفترخارجہ کا کہنا تھا کہ مقبوضہ کشمیر میں بھارتی مظالم کا سلسلہ جاری ہے، بھارتی فوج نے 10 معصوم کشمیریوں کو شہید کر دیا۔ کشمیری شہریوں کو مختلف علاقوں میں شہید کیا گیا۔ عالمی برادری کے لیے ضروری ہے بھارتی مظالم کا نوٹس لے۔

مزید پڑھیں : کشمیریوں کی حالت زار پر اقدامات پر یورپی پارلیمنٹ کے شکر گزار ہیں: دفتر خارجہ

یاد رہے کہ بھارت نے 27 فروری کو لائن آف کنٹرول پر پاکستانی ایف سولہ طیارہ مار گرانے کا دعویٰ کیا تھا جبکہ پاکستانی شاہینوں نے دو بھارتی مگ 21 طیارے مار گرائے تھے اور بھارتی پائلٹ کو بھی گرفتار کرلیا تھا، بعد ازاں جذبہ خیر سگالی کے تحت گرفتار پائلٹ کو بھارت کے حوالے کر دیا تھا۔

خیال رہے پاکستان اور بھارت کے درمیان قیدیوں کی فہرست کے تبادلہ دونوں ملکوں کے درمیان سال میں دو بار ہوتا ہے، دونوں ممالک معاہدے کے تحت سال میں دو مرتبہ یکم جنوری اور یکم جولائی کو قیدیوں کی فہرست کا تبادلہ کرتے ہیں۔

Comments

یہ بھی پڑھیں