The news is by your side.

Advertisement

مقبوضہ کشمیر: پاکستان کا بھارت سے کرونا پر تفصیلات فراہمی کا مطالبہ

اسلام آباد: ترجمان دفتر خارجہ نے کہا ہے کہ پاکستان کو مقبوضہ کشمیر میں کرونا کی صورت حال پر تشویش ہے، بھارتی حکومت مقبوضہ وادی میں کرونا پر تفصیلات فراہم کرے۔

تفصیلات کے مطابق پاکستان نے بھارت سے مقبوضہ کشمیر میں کرونا وائرس کے پھیلاؤ کی صورت حال پر تفصیلات کی فراہمی کا مطالبہ کر دیا ہے، ترجمان دفتر خارجہ عائشہ فاروقی نے میڈیا بریفنگ میں کہا کہ مقبوضہ کشمیر میں کرونا کی صورت حال پر تشویش ہے، بھارتی حکومت تفصیلات فراہم کرے۔

ترجمان کا کہنا تھا کہ وزارت خارجہ میں کرونا کے سلسلے میں خصوصی سیل قائم ہے جو سفارت خانوں سے رابطے میں ہے، دفتر خارجہ میں چوبیس گھنٹے کی ہیلپ لائن بھی قائم کر دی گئی ہے، پاکستانی سفارت خانوں نے کمیونٹی کی رہنمائی کے لیے فوکل پرسنز بھی مقرر کر دیے ہیں۔

انھوں نے بتایا کہ صدر پاکستان ڈاکٹر عارف علوی نے وفاقی وزرا کے ہمراہ چین کا دورہ کیا، چین میں 2 معاہدوں پر دستخط ہوئے، چین اور پاکستان نے مشکل وقت میں ساتھ کھڑے ہونے کے عزم کا اظہار کیا، صدر اور وزیر خارجہ نے ووہان میں موجود طلبہ کے ساتھ بھی ویڈیو لنک پر رابطہ کیا۔

ترجمان کا کہنا تھا کہ دفتر خارجہ میں دستاویزات کی تصدیق اب صرف کوریئر سروس کے ذریعے ہوگی، کرونا پر قابو پانے کے لیے وفاقی اور صوبائی سطح پر اقدام کیے جا رہے ہیں، وزارت خارجہ میں کرونا سے نمٹنے کے لیے کرائسز مینجمنٹ سیل قائم کر دیا گیا ہے، کرونا پر آگاہی سے متعلق میڈیا کا کردار انتہائی اہم ہے، شہریوں کی بہتری کے لیے تمام ضروری اقدامات کیے گئے ہیں، شہریوں سے کہا گیا ہے کہ حفاظتی اقدامات پر عمل کریں۔

fb-share-icon0
Tweet 20

Comments

comments

یہ بھی پڑھیں