اسلام آباد: پاکستان نے ادلب میں ترک فوجیوں کی اموات پر ترکی کی قیادت اور عوام سے اظہار یکجہتی کرتے ہوئے غمزدہ خاندانوں سے اظہار ہمدری کیا ہے۔
ترجمان دفتر خارجہ سے جاری بیان میں کہا گیا ہے کہ شام کے شہر ادلب کی بگڑتی صورتحال پر پاکستان کو تشویش ہے، شام میں حالیہ واقعات علاقائی امن کیلئےخطرہ ہیں۔
بیان کے مطابق پاکستان گزشتہ روز ادلب میں جاں بحق ہونے والے ترک فوجیوں کے اہلخانہ، ترک قیادت و قوم سے اظہار تعزیت اور غمزدہ خاندانوں سے ہمدردی کا اظہار کرتا ہے۔
یہ بھی پڑھیں: شام کے شہر ادلب میں فضائی حملہ، 33 ترک فوجی ہلاک
ترجمان دفتر خارجہ نے کہا کہ پاکستان ترکی کی سلامتی کے قانونی حق کوتسلیم کرتا ہے اور ترکی کی انسانی المیہ کےخاتمےمیں کردار کی حمایت کرتا ہے۔
ترجمان کا کہنا ہے کہ شام میں حالیہ واقعات علاقائی امن کیلئےخطرہ ہیں اس لیے عالمی برادری مسائل کےحل کیلئےاپنا کردار ادا کرے۔
واضح رہے کہ گزشتہ روز ادلب میں حملوں کے دوران 33 ترک فوجی جاں بحق ہوگئے تھے، ترک حکام کا کہنا ہے کہ علاقے میں تعینات فوجیوں پر شامی افواج نے حملہ کیا۔
ترک حکام کے مطابق ترک افواج نے حملے کے بعد جوابی کارروائی کی جس میں شامی افواج کے ٹھکانوں پر گولہ باری کی گئی، شامی فوج کے تمام ٹھکانوں کو زمین اور فضا سے نشانہ بنایا جا رہا ہے۔
