پاکستانی فلم اور ٹی وی انڈسٹری کے معروف ہدایتکار پرمیش ادیوال نے اسلامی تعلیمات سے متاثر ہو کر اسلام قبول کر لیا ہے اور اپنا نام محمد رکھ لیا ہے۔
پاکستان فلم انڈسٹری اور ٹی وی کے ڈائریکٹر پرمیش ادیوال نے اسلام قبول کر لیا ہے جس کے بعد انہوں نے سعودی عرب میں عمرے کی ادائیگی کی سعادت بھی حاصل کی ہے۔ ہدایت کار نے اپنا اسلامی نام محمد رکھا ہے۔
نو مسلم ہدایت کار نے فوٹو اینڈ ویڈیو شیئرنگ پلیٹ فارم انسٹاگرام پر مسجد نبوی ﷺ کی ایک روح پرور ویڈیو بھی شیئر کی ہے جس میں انہیں نماز کی ادائیگی اور اس کے بعد دعا کرتے ہوئے دیکھا جا سکتا ہے۔
View this post on Instagram
انہوں نے اس ویڈیو پوسٹ کو ’تاجدار حرم‘ کے عنوان سے کیپشن دیا ہے۔ ویڈیو کے پس منظر میں عاطف اسلم کی نعتیہ کلام پر مبنی قوالی تاجدار حرم سنائی دیتی ہے۔
واضح رہے کہ پرمیش ادیوال پاکستانی شوبز انڈسٹری میں کئی برسوں سے کام کر رہے ہیں۔ انہوں نے بلاک بسٹر فلم ’پنجاب نہیں جاؤں گی‘ میں بطور سونگ ڈائریکٹر کام کر رکھا ہے جبکہ وہ فلم ’عشرت میڈ اِن چائنہ‘ میں بطور کو ڈائریکٹر کام کر چکے ہیں۔ اس کے علاوہ وہ پاکستانی ڈراما سیریل ’ماسٹرز‘ سمیت کئی ڈراموں کے او ایس ٹی ٹریکس ڈائریکٹ کر چکے ہیں۔
سوشل میڈیا پر اسلام قبول کرنے کے اعلان کے بعد ہدایت کار کی پوسٹ پر ساتھی فنکاروں کی جانب سے مبارک باد کا سلسلہ جاری ہے۔
