نیویارک(18 جولائی 2025): پاکستان نے شام پر اسرائیلی جارحیت کی شدید مذمت کی ہے، پاکستان نے شامی خود مختاری اور بین الاقوامی قانون کے احترام کا مطالبہ کیا ہے۔
تفصیلات کے مطابق اقوام متحدہ میں پاکستان کے مستقل مندوب عاصم افتخار نے شام کی صور تحال پر بیان میں کہا کہ اسرائیل کی مسلسل خلاف ورزیاں بے لگامی کی علامت ہیں۔
عاصم افتخار کا کہنا تھا کہ اسرائیلی حملے بے لگامی اور جوابدہی کے فقدان کا نتیجہ ہیں، اسرائیل شام، غزہ، لبنان ودیگر ریاستوں کی خود مختاری پامال کررہا ہے۔
پاکستان کے مستقل مندوب نے کہا کہ اسرائیلی حملے شامی ریاستی اداروں کو کمزور کررہے ہیں، اسرائیل کی مداخلت تعمیرِ نو ومفاہمتی کوششوں کو نقصان پہنچارہی ہے۔
عاصم افتخار کا کہنا تھا کہ شام کو اس وقت جارحیت نہیں، حمایت کی ضرورت ہے، پاکستان نے عالمی برادری سے مطالبہ کیا کہ شام کی قومی تعمیر نو کیلئے عالمی حمایت ناگزیر ہے، پاکستان شامی عوام کیساتھ مکمل یکجہتی کا اظہار کرتا ہے۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں