اسلام آباد: برطانیہ میں فنکشن کے دوران پاکستانی ہائی کمشنر کے نا مناسب رویے پر وزیرِ داخلہ نے نوٹس لیتے ہوئے مذکورہ ہائی کمشنر سے وضاحت طلب کر لی۔
تفصیلات کے مطابق برطانیہ میں ہونے والی ایک تقریب میں پاکستانی ہائی کمشنر کی غیر مہذبانہ حرکتوں نے تقریب میں شریک پاکستانیوں کے سر شرم سے جھکا دیے تھے۔
وزارتِ داخلہ سے جاری ہونے والے اعلامیے میں کہا گیا ہے کہ وزیرِ خارجہ نے پاکستانی ہائی کمشنر سے تحریری وضاحت طلب کرلی ہے، تحریری وضاحت کے ساتھ ہائی کمشنر کو وزارتِ خارجہ میں پیش ہونے کی بھی ہدایت کی گئی۔
خیال رہے کہ تقریب میں پاکستانی ہائی کمشنر صاحب زادہ احمد خان کا رویہ ایک سفیر کے شایانِ شان نہ تھا، کمپئیرنگ کے دوران ہائی کمشنر اداکاروں سے نا مناسب سوالات کرتے رہے۔
مزید پڑھیں: لندن: تقریب میں پاکستانی ہائی کمشنر کی غیرمہذبانہ حرکتیں
تقریب میں پاکستانی ہائی کمشنر کو بہ طورِ مہمانِ خصوصی مدعو کیا گیا تھا، جب خطاب کے لیے انھیں مائیک دیا گیا تو ہائی کمشنر خود پر قابو نہ رکھ سکے اور تقریب کی نظامت کرنے لگ گئے۔
صاحب زادہ احمد خان نے پاکستانی اداکار جاوید شیخ کو بھی نہ بخشا اور انھیں الٹے سیدھے سوالات کر کے زچ کرتے رہے، جس پر جاوید شیخ ناراض بھی نظر آئے۔
