اسلام آباد: پاکستانی دفتر خارجہ نے چینی باشندوں کی پاکستانی لڑکیوں سے شادیوں کے معاملے پر بیان جاری کر دیا.
تفصیلات کے مطابق ترجمان دفتر خارجہ نے کہا ہے کہ دونوں ملکوں کے متعلقہ حکام کا اس معاملے پر قریبی رابطہ ہے.
ترجمان دفتر خارجہ کے مطابق چین کی حکومت نے اس معاملے پر ہرممکن تعاون کی پیش کش کی ہے، چینی حکومت کے اس عمل کو بے حد سراہتے ہیں، چینی حکام کی ایک ٹیم نے حالیہ دنوں میں پاکستان کا دورہ بھی کیا.
ترجمان کے مطابق چینی حکام نے پاکستانی قانون نافذ کرنے والے حکام سے ملاقاتیں بھی کیں، دفتر خارجہ اور چین میں پاکستانی مشنز صورتحال کی مانیٹرنگ کر رہے ہیں، شکایت کی صورت میں پاکستانی شہریوں کو ہرممکن معاونت فراہم کی جارہی ہے.
مزید پڑھیں: شادی کے جھانسے میں انسانی اسمگلنگ ، چین میدان میں آگیا
پاکستان کا کہنا ہے کہ چینی سفارتخانے کی وضاحت کے بعد سنسنی پھیلانے سے گریز کیا جائے، صرف حقائق پر مبنی باتوں کو رپورٹ کیا جائے، چینی حکام کے مطابق جسم فروشی، اعضاکی فروخت کا کوئی واقعہ پاکستانیوں کے ساتھ پیش نہیں آیا.
ترجمان کے مطابق دفترخارجہ اور چین میں پاکستانی سفارت خانہ صورت حال کا بہ غور جائزہ لے رہے ہیں، کسی بھی پاکستانی خاتون کی شکایت پرفوری کارروائی کی جارہی ہے.
