The news is by your side.

Advertisement

ہاکی ورلڈ کپ میں شکست، گول کیپر عمران بٹ نے ریٹائرمنٹ کا اعلان کردیا

لاہور: ہاکی ورلڈ کپ میں بدترین شکست کے بعد قومی ہاکی ٹیم کے گول کیپر عمران بٹ نے انٹرنیشنل ہاکی سے ریٹائرمنٹ کا اعلان کردیا۔

تفصیلات کے مطابق ہاکی ورلڈ کپ میں ناکامی کے بعد بلیم گیم شروع ہوگیا ہے، مینجمنٹ نے سینئر کھلاڑیوں کو شکست کا ذمہ دار ٹھہرایا تو کپتان رضوان سینئر نے بھی مینجمنٹ کو آڑے ہاتھوں لے لیا، ٹیم کے گول کیپر عمران بٹ نے دلبرداشتہ ہوکر ریٹائرمنٹ کا اعلان کردیا۔

عمران بٹ نے 156 میچوں میں پاکستان کی نمائندگی کی ہے، ان کا کہنا ہے کہ وہ پریس کانفرنس میں اپنی ریٹائرمنٹ کی وجوہات بتائیں گے۔

عمران بٹ نے کہا کہ بھارت میں ہونے والا ورلڈ کپ ان کا آخری ایونٹ تھا۔

ورلڈ کپ میں شکست کے بعد استعفوں کی لائن لگ گئی ہے اس سے قبل ہیڈ کوچ، معاون کوچ بھی مستعفی ہوچکے ہیں۔

رضوان سینئر نے کہا کہ ٹیم مینجمنٹ نے غلطیاں چھپانے کے لیے استعفیٰ دیا ہے، ہمیں فوٹو سیشن والی مینجمنٹ نہیں چاہئے، کھلاڑیوں کا کہنا ہے کہ یہی حال رہا تو اولمپکس 2020 تو دور کی بات ہے کوالیفائر جیت گئے تو بھی معجزہ ہی ہوگا۔

خیال رہے کہ پاکستان ہاکی ورلڈ کپ کے پری کوارٹر فائنل مرحلے میں شکست کھا کر باہر ہوگیا تھا تاہم اس کے باوجود پاکستانی ٹیم کی رینکنگ میں ایک درجہ بہتری ہوئی ہے اور وہ تیرہویں سے بارہویں نمبر پر آگئی ہے۔

Comments

comments

یہ بھی پڑھیں