لاہور: پیرس اولمپک کوالیفائنگ راؤنڈ میں شرکت کے بعد پاکستان ہاکی ٹیم وطن واپس پہنچ گئی ہے۔
چار مرتبہ کا ورلڈ چیمپئن، تین مرتبہ کا اولمپک گولڈ میڈلسٹ اور تین مرتبہ چیمپئنز ٹرافی کا فاتح مسلسل تیسری مرتبہ اولمپکس کے لیے کوالیفائی کرنے میں ناکام رہا ہے، پاکستان ہاکی ٹیم کو اولمپکس کوالیفائر میں تیسری پوزیشن کے میچ میں نیوزی لینڈ نے ہرادیا۔
تاہم وطن واپس آنے کے بعد ہیڈ کوچ شہناز شیخ اور کپتان عماد شکیل بٹ نے میڈیا سے گفتگو کرتے ہوئے کہا کہ ہمیں اولمپک میں شرکت سے محروم کیا گیا۔
شہناز شیخ نے کہا کہ سیمی فائنل کے آخری لمحات میں ہونے والے فیصلے پر احتجاج کیا، ایمپائر کے فیصلے کے خلاف ایف آئی ایچ کو تحریری شکایت کی گئی ہے۔
ہیڈ کوچ شہناز شیخ کا کہنا تھا کہ کوالیفائنگ راؤنڈ کے لیے تیاری کے لیے کم وقت ملا، ہمارے ملک میں غیر ملکی کوچز مسئلے کا حل نہیں، جدید ٹیکنالوجی کو اپنانا ہو گا۔
واضح رہے کہ پاکستان 2020 اور 2016 کے اولمپکس میں بھی کوالیفائی نہیں کر سکا تھا۔
