اسلام آباد: وزارت خزانہ کو عالمی مالیاتی ادارے (آئی ایم ایف) کے ساتھ آخری جائزہ مذاکرات کے مثبت نتائج کی امید ہے۔
تفصیلات کے مطابق ذرائع وزارت خزانہ نے کہا ہے کہ پاکستان نے عالمی مالیاتی ادارے (آئی ایم ایف) کے ساتھ آخری جائزے کے لیے تمام اہم شرائط پوری کرلی ہیں۔
ذرائع وزارت خزانہ کا کہنا ہے کہ آئی ایم ایف نے موجودہ پروگرام کے تحت تاحال کوئی نئی شرط عائد نہیں کی ہے شیڈول کے مطابق آخری جائزہ مذاکرات کل ختم ہوجائیں گے۔
حکومت کی آئی ایم ایف کو نجکاری پروگرام پر کام تیز کرنے کی یقین دہانی
ذرائع وزارت خزانہ نے دعویٰ کیا کہ پاکستان اور آئی ایم ایف کے مذاکرات کی کامیابی کے امکانات روشن ہیں، آئی ایم ایف کے ساتھ مذاکرات تعمیری اور مثبت انداز سے جاری ہیں۔
ذرائع نے بتایا کہ پاکستان آخری جائزے کیلئے تمام اہم شرائط پوری کرچکا ہے اب مذاکرات کی کامیابی آئی ایم ایف کے اطمینان سے مشروط ہے، مذاکرات کی کامیابی سے متعلق فیصلہ اب آئی ایم ایف نے کرنا ہے۔
ذرائع وزارت خزانہ کا بتانا ہے کہ مذاکرات کی کامیابی پر پاکستان اور آئی ایم ایف کے درمیان اسٹاف سطح معاہدہ ہوگا، مذاکرات کی کامیابی پر جائزہ مشن 1.1 ارب ڈالرز کی آخری قسط کیلئے سفارش کرے گا، آئی ایم ایف ایگزیکٹو بورڈکو پاکستان کیلئے قسط جاری کرنے کی سفارش کی جائے گی۔
ذرائع نے مزید بتایا کہ پاک، آئی ایم ایف مذاکرات 3 ارب ڈالرز کے قلیل مدتی قرض پروگرام کے تحت ہورہے ہیں پاکستان کو 2 اقساط کی مد میں آئی ایم ایف سے ایک ارب 90 کروڑ ڈالرز مل چکے ہیں۔
