اسلام آباد: پاکستان اور اردن کے درمیان مختلف شعبوں میں تعاون کی مفاہمتی یادداشتوں پر دستخط کرلیے گئے۔
اے آر وائی نیوز کے مطابق پاکستان اور اردن کے درمیان میڈیا، ثقافت، تعلیم کے شعبوں میں مفاہمتی یادداشتوں کا تبادلہ کیا گیا ہے۔
وزیراعظم شہباز شریف نے شاہ عبداللہ دوم اور وفد کے اعزاز میں عشائیے کا بھی اہتمام کیا جس میں نائب وزیراعظم اسحاق ڈار، وفاقی وزیر اطلاعات عطا تارڑ ودیگر نے بھی شرکت کی۔
علاوہ ازیں وزیراعظم شہباز شریف اور شاہ اردن کی ملاقات ہوئی جس میں فیلڈ مارشل عاصم منیر اور وفاقی وزرا نے شرکت کی، شہباز شریف نے پی ایم ہاؤس آمد پر شاہ اردن کا استقبال کیا، دونوں رہنماؤں میں دو طرفہ تعلقات مزید گہرا کرنے پر اتفاق ہوا، تجارت، سرمایہ کاری، صحت، دفاعی شعبوں میں تعاون بڑھانے کی ضرورت پر زور دیا گیا۔
پاکستان اور اردن میں اسٹریٹجک اور اقتصادی تعلقات بڑھانے پر بھی اتفاق کیا گیا، علاقائی، بین الاقوامی فورمز پر باہمی تعاون کو وسعت دینے کے عزم کا اعادہ کیا گیا۔
شہباز شریف نے کہا کہ شاہ عبداللہ دوم کا دورہ پاکستان پائیدار دوستی کا ثبوت ہے، انہوں نے غزہ میں استحکام کے لیے اردن کے کردار کے لیے پاکستان کی حمایت کی تعریف کی۔
دونوں رہنماؤں نے اتفاق کیا کہ غزہ سے فلسطینیوں کا انخلا قبول نہیں، غزہ میں امن معاہدے کے حوالے سے روابط مزید بڑھانے پر اتفاق کیا گیا، افغانستان اور بھارت سے متعلق امور پر اعتماد میں لیا گیا۔
شاہ عبداللہ دوم نے خطے میں امن و استحکام پاکستان کے کلیدی کردار کا اعتراف کیا اور بھرپور مہمان نوازی، شاندار استقبال پر شکریہ ادا کیا ہے۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں