پاک بحریہ کا سی کنگ ہیلی کاپٹر سے میزائل فائرنگ کا شاندار مظاہرہ -
The news is by your side.

Advertisement

پاک بحریہ کا سی کنگ ہیلی کاپٹر سے میزائل فائرنگ کا شاندار مظاہرہ

کراچی: پاک بحریہ نے شمالی بحیرہ عرب میں سی کنگ ہیلی کاپٹر سے میزائل فائرنگ کا شاندار مظاہرہ کیا۔ اس موقع پر چیف آف نیول اسٹاف ایڈمرل محمد ذکا اللہ کا کہنا تھا کہ ہیلی کاپٹر سی کنگ سے کامیاب میزائل فائرنگ پاکستان نیوی فلیٹ کی جنگی تیاری اور پیشہ ورانہ صلاحیتوں کا واضح ثبوت ہے۔

تفصیلات کے مطابق پاک بحریہ نے آج شمالی بحیرہ عرب میں میزائل فائرنگ کا شاندار مظاہرہ کیا۔

چیف آف نیول اسٹاف ایڈمرل محمد ذکا اللہ نے کھلے سمندر میں ویپن فائرنگ کا یہ مظاہرہ دیکھا اور پاکستان نیوی فلیٹ کی جنگی تیاریوں کو سراہا۔

فائر پاور کے اس بھرپور مظاہرے کے دوران پاکستان نیوی کے سی کنگ ہیلی کاپٹر نے فضا سے سطح آب پر مار کرنے والا اینٹی شپ میزائل فائر کیا جس نے اپنے ہدف کو پوری کامیابی سے نشانہ بنایا جو ہتھیاروں کی ہلاکت خیزی اور نیول فلیٹ کی حربی صلاحیتوں کا مظہر ہے۔

نیول ہیلی کاپٹر سی کنگ سے کامیاب میزائل فائرنگ پاکستان نیوی فلیٹ کی جنگی تیاری اور پیشہ ورانہ صلاحیتوں کا واضح ثبوت ہے۔

چیف آف دی نیول اسٹاف نے سمندر میں تعینات فلیٹ یونٹس کا دورہ بھی کیا اور جاری بحری مشقوں کا معائنہ کیا۔

سربراہ پاک بحریہ ایڈمرل محمد ذکا اللہ نے نیول فلیٹ کی جنگی تیاریوں پر مکمل اطمینان کا اظہار کیا اور فائرنگ کے اس کامیاب مظاہرے میں شامل تمام افسروں اور جوانوں کی کاوشوں کی تعریف کی اور ان کی پیشہ وارانہ صلاحیتوں اور بلند عزم و حوصلے کو سراہا۔

انہوں نے اس عزم کا اعادہ کیا کہ پاک بحریہ وطن عزیز کی بحری سرحدوں اور مفادات کا ہر قیمت پر تحفظ کرے گی۔


اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

Comments

comments

یہ بھی پڑھیں