آئی سی سی چیمپئنز ٹرافی 2025 کا آغاز پاکستان میں ہونے جا رہا ہے، کرکٹ شائقین کو اس بات کا شدت سے انتظار تھا کہ صائم ایوب کی انجری کے بعد پاکستان کی اوپنگ جوڑی کیا ہوگی۔
رپورٹس کے مطابق چیمپئنز ٹرافی ٹورنامنٹ میں پاکستان کے سابق کپتان بابر اعظم فخر زمان کے ساتھ اننگز کا آغاز کریں گے۔ عاقب جاوید اور کوچز نے سابق کپتان کو اوپنر کی حیثیت سے کھیلنے پر راضی کر لیا ہے۔
ذرائع کے مطابق سابق کپتان بابر اعظم کے ساتھ سلیکٹر کی کئی میٹنگز منعقد ہوئیں، بابر اعظم کو کریز پر زیادہ وقت اور اوورز کھیلنے کا مشن سونپا گیا ہے۔
صائم ایوب کے زخمی ہونے کے باعث بابر اعظم نے اہم ذمے داری کو قبول کرلیا ہے۔
واضح رہے کہ گزشتہ روز آئی سی سی چیمپئنز ٹرافی 2025ء کے لیے 15 رکنی پاکستان کرکٹ ٹیم کا اعلان کیا بھی کردیا گیا ہے۔
آئی سی سی چیمپئنز ٹرافی کے لیے قومی ٹیم کی قیادت محمد رضوان کریں گے جبکہ فخر زمان، خوشدل شاہ، سعود شکیل اور فہیم اشرف کی ٹیم میں واپسی ہوئی ہے۔
اسکواڈ میں نائب کپتان سلمان علی آغا، بابر اعظم، کامران غلام، طیب طاہر شامل ہیں۔ عثمان خان، اسپنر ابرار احمد، حارث رؤف، محمد حسنین، نسیم شاہ، شاہین شاہ آفریدی بھی ٹیم کا حصہ ہیں۔
نیوزی لینڈ، جنوبی افریقا کے خلاف سہ فریقی ون ڈے سیریز میں بھی یہی ٹیم کھیلے گی۔
سلیکٹر اسد شفیق کا کہنا ہے کہ فخر زمان کے اوپننگ پارٹنر بابر اعظم یا سعود شکیل ہوسکتے ہیں، ہوم کنڈیشنز میں عمدہ کارکردگی کے حامل کرکٹرز کا سلیکشن کیا گیا ہے۔
انہوں نے کہا کہ اندازہ ہے صائم ایوب کے لیے چیمپئنز ٹرافی نہ کھیلنا کتنا تکلیف دہ ہے، ہم جلد بازی میں کوئی بھی فیصلہ نہیں کرنا چاہتے۔
شاہد آفریدی نے کیریئر کا بہترین چھکا بتا دیا
واضح رہے کہ پاکستان چیمپئنز ٹرافی میں اپنا پہلا میچ 19 فروری کو نیوزی لینڈ کے خلاف کراچی میں کھیلے گا۔
