اسلام آباد: سابق وزیر پٹرولیم کا کہنا ہے کہ پاکستان کی معیشت کو توانائی کے نقصانات روکنے کی ضرورت ہے۔
تفصیلات کے مطابق سابق وزیر پٹرولیم سینیٹر مصدق ملک کا ایس ڈی پی آئی سیمینار سے خطاب کرتے ہوئے کہنا تھا کہ توانائی کے مسلسل نقصانات معیشت کے لیے خطرہ ہیں، پاکستان کو اس طرح کے نقصانات روکنا ہوں گے۔ پاکستان ہوا اور سورج سے بجلی بنانے کی جنت ہے۔
مصدق ملک نے کہا کہ پاکستان کو بجلی نہیں بلکہ سستی بجلی کی ضرورت ہے۔ مسلسل توانائی کا نقصان ہوتا رہا تو معیشت خطرے میں پڑ جائے گی۔
انھوں نے کہا کہ پاکستان کا ہر بہتہ دریا سستی توانائی کا ذریعہ بن سکتا ہے۔ پاکستان کو ماحول دوست توانائی کی ضرورت ہے۔
سابق وزیر پٹرولیم کا کہنا تھا کہ60 ہزار روپے ماہانہ کمانے والا بھی مہنگی بجلی کا بل ادا نہیں کرسکتا۔ ملک کے گھروں کو گیس سے بجلی کی طرف منتقل کرنا ہو گا۔
مصدق ملک نے کہا کہ صارف مہنگی بجلی کے ہوتے ہوئے سستی گیس نہیں چھوڑے گا۔ امیر لوگوں نے سستی گیس کو اپنی فیکٹریوں کیلئے لے رکھا ہے۔
