اسلام آباد : پاکستان نے چین کی حکومت اور عوام کو ملک سے ملیریا کے خاتمے پر مبارکباد دیتے ہوئے کہا خوشی ہے کہ پاکستان کے ہر وقت کے ساتھی نے یہ سنگ میل عبور کیا۔
تفصیلات کے مطابق پاکستانی ترجمان دفترخارجہ نے سماجی رابطے کی ویب سائٹ ٹوئٹر پر چین کی حکومت اورعوام کو ملک سے ملیریا کے خاتمے پر مبارکباد دیتے ہوئے کہا 1940 میں 3 کروڑ کیسز سے آج چین میں ملیریا کا خاتمہ بڑی کامیابی ہے، خوشی ہے کہ پاکستان کے ہر وقت کے ساتھی نے یہ سنگ میل عبور کیا۔
Congratulations to Govt & people of China on ridding the country of Malaria as certified by WHO. From 30m cases annually in 1940 to eradicating mosquito-borne disease is indeed a great achievement. Good to see our “all weather strategic cooperative partner”achieve this milestone
— Zahid Hafeez Chaudhri (@Zhchaudhri) July 1, 2021
یاد رہے گذشتہ روز ورلڈ ہیلتھ آرگنائزیشن نے اعلان کرتے ہوئے 70 برس بعد چین کو ملیریا سے پاک قرار دیا اور کہا 1940 کی دہائی میں چین میں ملیریا کے سالانہ 3 کروڑ کیسز رپورٹ ہوتے تھے، لیکن گزشتہ چار برسوں میں ایک کیس بھی سامنے نہیں آیا۔
ڈبلیو ایچ او کے ڈائریکٹر جنرل ٹیدروس اڈہانوم نے کہا تھا کہ ہم چین کے لوگوں کو ملیریا سے چھٹکارا حاصل کرنے پر مبارک باد دیتے ہیں، انھیں یہ کامیابی کئی دہائیوں کی کوشش سے اور بہت مشکل سے ملی ہے۔
عالمی ادارہ صحت کی جانب سے اس اعلان کے بعد چین دنیا کے ان ممالک میں شامل ہو گیا ہے جنھوں نے ملیریا پر قابو پایا، ان ممالک کی تعداد چین کے شامل ہونے سے 40 ہو گئی ہے، اس سے قبل گزشتہ تین برسوں کے دوران ایلسلواڈور، الجیریا، ارجنٹینا، پیرا گوئے اور ازبکستان نے ملیریا فری ممالک کا درجہ حاصل کیا تھا۔
