The news is by your side.

Advertisement

محکمہ ریلوے کا فیض احمد فیض اور لاثانی ٹرین چلانے کا فیصلہ

کراچی: محکمہ ریلوے نے 2 مزید ٹرینیں چلانے کا فیصلہ کر لیا ہے، یہ ریل گاڑیاں مشہور شاعر فیض احمد فیض اور لاثانی ٹرینوں کے نام سے چلائی جا رہی ہیں۔

تفصیلات کے مطابق محکمہ ریلوے نے لاہور نارووال کے درمیان فیض احمد فیض ٹرین چلانے کا فیصلہ کیا ہے، فیض پسنجر لاہور سے شام ساڑھے 6 بجے روانہ ہو کر رات 8 بج کر 55 منٹ پر نارووال پہنچے گی۔

فیض پسنجر نارووال سے صبح ساڑھے 5 بجے روانہ ہو کر ساڑھے 7 بجے لاہور پہنچے گی۔

محکمہ ریلوے نے لاہور سے سیالکوٹ کے لیے لاثانی ایکسپریس چلانے کا بھی فیصلہ کیا ہے، لاثانی ایکسپریس لاہور سے دوپہر 3 بج کر 45 منٹ پر روانہ ہو کر سیالکوٹ 7 بج کر 45 منٹ پر پہنچے گی۔

لاثانی ایکسپریس سیالکوٹ سے صبح 6 بجے روانہ ہوگی اور 9 بج کر 55 منٹ پر لاہور پہنچے گی۔

21 ستمبر سے ریل کرایوں میں کمی کا اعلان

محکمے کے مطابق سیالکوٹ، نارووال اور لاہور کے درمیان پسنجر ٹرین چلنے سے مزدور پیشہ افراد کو تیز رفتار سواری مہیا ہوگی۔

ادھر محکمہ ریلوے نے اے سی بزنس اور اے سی اسٹینڈرڈ میں سفر کرنے والے مسافروں کو خوش خبری دیتے ہوئے کہا ہے کہ 21 ستمبر سے اے سی بزنس کلاس کے کرایوں میں 10 فی صد کمی کی جا رہی ہے، جب کہ اے سی اسٹینڈرڈ کے کرایوں میں بھی 5 فی صد کمی کی جائے گی۔

محکمہ ریلوے کے مطابق 14 ستمبر سے تمام ایکسپریس ٹرینوں میں ڈائننگ ریسٹورںٹ کاریں دوبارہ لگا دی جائیں گی، جنھیں کرونا وائرس کے پھیلاؤ کی وجہ سے ہٹایا گیا تھا، ریلوے مسافروں کو اب ٹرین میں ناشتہ، کھانا، چائے اور دیگر کھانے پینے کی اشیا دستیاب ہوں گی۔

Comments

یہ بھی پڑھیں