پاکستان عالمی انڈیکس کی معاشی درجہ بندی میں پانچویں نمبرپرآگیا -
The news is by your side.

Advertisement

پاکستان عالمی انڈیکس کی معاشی درجہ بندی میں پانچویں نمبرپرآگیا

کراچی: اسٹیٹ بنک کے مطابق مالی شمولیت کے عالمی انڈیکس 2015 میں درجہ بندی کے لحاظ سے پاکستان سرفہرست پانچ ممالک میں شامل ہوگیا۔

مالی شمولیت کے عالمی انڈیکس میں پاکستان کی مالی شمولیت کی درجہ بندی اضافے کے ساتھ 5 ویں نمبر پرآگئی ہے جو کہ 2014 کی رینکنگ سے دو درجے زیادہ ہے۔ یہ بات دی اکانومسٹ انٹیلی جنس یونٹ (ای آئی یو) کی گلوبل مائیکرو اسکوپ رپورٹ 2015 میں کہی گئی ہے۔

ای آئی یو کی رپورٹ کے مطابق پاکستان کی درجہ بندی میں بہتری کے اہم عوامل میں اعلیٰ سطح پر عزم، مستقل مزاجی اور اسٹیٹ بینک کی جانب سے سال کے دوران مالی شمولیت کے حوالے سے کیے جانے والے اقدامات شامل ہیں۔ اس میں خاص طور پر بتایا گیا ہے کہ پاکستان کی مالی شمولیت (financial inclusion ) کی ترقی کی بنیادمالی شمولیت کی ایک بہت اچھی دستاویزی اور مربوط قومی حکمت عملی (این ایف آئی ایس)، آسان اکائونٹس کی پالیسی، کریڈٹ بیورو ایکٹ کی منظوری، عالمی Better Than Cash Alliance کی رکنیت اور مالی خواندگی کے اقدامات پر رکھی گئی ہے۔

رپورٹ میں این ایف آئی ایس کے پاکستان میں نفاذ کو درپیش اہم مسائل کی نشاندہی بھی کی گئی ہے جن میں پسماندہ منڈیوں کو قرضوں کی محدود فراہمی، زمین کے ٹائٹل اوررجسٹریشن میں نقائص، منقولہ اثاثوں کے لیےمحفوظ ٹرانزیکشن فریم ورک اورالیکٹرانک ضمانت رجسٹری کی غیرموجودگی اورمالی اداروں و صارفین دونوں میں استعداد کا فقدان ہے۔

یہاں یہ امر قابل ذکر ہے کہ این ایف آئی ایس میں ان چیلنجز کو ترجیحی طورپرشامل کیا گیا ہے تا کہ منظم اور پائیداراندازمیں آفاقی مالی شمولیت کے حصول کے لیے اصلاحات کی جا سکیں۔

گلوبل مائیکرو اسکوپ رپورٹ 2015 میں 12 اظہاریوں (indicators) اور55 ممالک میں مالی شمولیت کے ضوابطی ماحول کا جائزہ لیا گیا ہے۔ ممالک کی درجہ بندی ان کی مالی شمولیت، ضوابطی و نگرانی ماحول، منڈی کے انفراسٹرکچر اور مالی استحکام وغیرہ میں ان کی پیش رفت اورعزم کو مدنظر رکھتے ہوئے کی گئی ہے۔

مائیکرو اسکوپ 2015 مالی شمولیت کے شعبے سے وابستہ پیشہ ور افراد، پالیسی سازوں، سرمایہ کاروں اور دیگر فریقوں کے لیے جاری کی جاتی ہے تا کہ ان کے متعلقہ کردار کے ذریعے مالی شمولیت کو مزید فروغ دیا جا سکے۔

Comments

comments

یہ بھی پڑھیں