The news is by your side.

Advertisement

پاکستان اسٹریٹ چائلڈ فٹ بال ٹیم آج صبح وطن واپس پہنچ گئی، اسلام آباد ایئر پورٹ پر شان دار استقبال

اسلام آباد: پاکستان اسٹریٹ چائلڈ فٹ بال ٹیم آج صبح وطن واپس پہنچ گئی، پاکستان ٹیم اسٹریٹ چائلڈ فٹ بال ورلڈ کپ میں رنر اپ پوزیشن کے ساتھ وطن لوٹی۔

تفصیلات کے مطابق پاکستان اسٹریٹ چائلڈ فٹ بال ٹیم کا اسلام آباد ایئرپورٹ پر استقبال وزیر مذہبی امور پیر محمد امین الحسنات‘ چیئرمین مسلم ہینڈز حسنین اور فٹ بال کے دیگر شائقین نے کیا۔

اسلام آباد ایئر پورٹ پر میڈیا سے بات چیت کرتے ہوئے پیر حسنات نے کہا کہ یہ بچے ہمارے ہیرو ہیں، ہمیں اسٹریٹ چائلڈ فٹ بال ٹیم پر فخر ہے، میں وزیراعظم اور صدر سے اپیل کرتا ہوں کہ ٹیم کو انعامات سے نوازا جائے۔

وزیر مذہبی امور کا کہنا تھا کہ وہ کھلاڑی جن پر قومی خزانے سے پیسا خرچ کیا جاتا ہے اور جن سے بہت توقعات وابستہ کی جاتی ہیں لیکن وہ خاطر خواہ نتائج نہیں لاتے، ان کے مقابلے میں ان بچوں نے اپنی اہمیت ثابت کی ہے۔

انھوں نے مسلم ہینڈز نامی تنظیم کا شکریہ ادا کرتے ہوئے کہا کہ اس نے مخلتف جگہوں سے یہ قابل بچے منتخب کیے اور ایک شان دار ٹیم تشکیل دی، میں تنظیم کا شکر گزار ہوں۔

پاکستان اسٹریٹ چائلد فٹ بال ٹیم کے کپتان نے میڈیا سے گفتگو کرتے ہوئے کہا کہ ہم نے ٹیم کو ساڑھے تین ماہ دن رات پریکٹس کرائی، پوری ٹیم بہت اچھا کھیلی مگر بد قسمتی سے ہم فائنل نہیں جیت پائے۔

یہ بھی پڑھیں: اسٹریٹ چائلڈ فٹبال ورلڈ کپ کے فائنل میں ازبکستان نے پاکستان کو شکست دے دی

انھوں نے کہا کہ پوری قوم کی دعائیں ہمارے ساتھ رہیں، ہمارے پاس اتنے وسائل نہیں جو دیگرممالک کی ٹیموں کے پاس ہیں، اگر سہولتیں فراہم کی جائیں تواس سے بہترکھیل پیش کریں گے۔

یہ بھی پڑھیں: تیسرا اسٹریٹ چائلڈ فٹبال ورلڈ کپ: پاکستان نے فائنل کیلئے کوالیفائی کرلیا

ٹیم کے ہیڈ کوچ نے بھی بات چیت کرتے ہوئے کہا کہ میں نے دیکھا ہے ہمارے بچوں میں بے پناہ ٹیلنٹ ہے، انشاءاللہ آئندہ ورلڈ کپ میں اس سے بہتر کارکردگی ہوگی۔

واضح رہے کہ پاکستان اسٹریٹ چائلد فٹ بال ٹیم نے ورلڈ کپ میں بہترین کارکردگی کا مظاہرہ کرتے ہوئے فائنل تک رسائی حاصل کرلی تھی لیکن ازبکستان ٹیم کو ٹف ٹائم دینے کے باوجود فائنل ہارگئی۔


خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

Comments

comments

یہ بھی پڑھیں