اسلام آباد: وفاقی وزیر برائے سائنس اینڈ ٹیکنالوجی فواد چوہدری نے نیٹ فلیکس استعمال کرنے والے پاکستانی صارفین کو بڑی خوش خبری سنادی۔
سماجی رابطے اور مائیکروبلاگنگ کی ویب سائٹ ٹویٹر پر اپنے ایک بیان میں فواد چوہدری کا کہنا تھا کہ ’وزارتِ سائنس اینڈ ٹیکنالوجی نیٹ فلیکس کا پاکستانی ورژن متعارف کرنے کے لیے مکمل تیار ہے‘۔
انہوں نے لکھا کہ ’ہم نیٹ فلیکس کی طرز پر پہلی پاکستانی او ٹی ٹی ٹیلی ویژن جلد لانچ کردیں گے، اس ضمن میں وزارت ٹیکنالوجی نے اپنا کام مکمل کرلیا ہے‘۔
فواد چوہدری نے لکھا کہ ’ہم نے پاکستان الیکٹرانک میڈیا ریگولیٹری اتھارٹی (پیمرا) کو او ٹی ٹی کے قواعد و ضوابط تیار کرنے کی ہدایت کردی ہے، جیسے ہی گائیڈ لائن تیار ہوگی ہماری سروس شروع ہوجائے گی‘۔
انہوں نے مزید لکھا کہ ’نجی شراکت داروں کے تعاون سے او ٹی ٹی سروس کو لانچ کریں گے‘۔
پاکستانی اداکاروں کو کیا فائدہ ہوگا؟
ٹیٹ فلکس پر اب تک چند ایک ہی پاکستانی فلمیں ریلیز ہوئی ہیں، جب او ٹی ٹی سروس متعارف ہوجائے گی تو مقامی لکھاریوں، پرڈیوسر، ہدایت کاروں اور فنکاروں کو اپنی صلاحیتیں دکھانے کا موقع ہوگا جس کے عوض انہیں معاشی فائدہ بھی ہوگا۔
We at @MinistryofST are all set to launch Pakistan’s first OTT Tv (Pak version of #Netflix) Technology part is complete have asked PEMRA to prepare a guideline on content and we will be all set to launch in PPP mode, it ll be just another humble contribution..
— Ch Fawad Hussain (@fawadchaudhry) October 23, 2020
او ٹی ٹی سروس کیا ہے؟
او ٹی ٹی (اوور دی ٹاپ) ایک ایسا پلیٹ فارم ہے جو انٹرنیٹ کی مدد سے استعمال کیا جاتا ہے اور اس پر فلمیں ، ڈراموں سمیت دیگر چیزیں ویڈیو کی صورت میں شیئر کی جاسکتی ہیں، اس کو استعمال کرنے کے لیے صارف کو سیٹلائٹ ٹی وی یا کیبل کی ضرورت پیش نہیں آتی۔
