The news is by your side.

Advertisement

پہلا ٹی ٹوینٹی: پاکستان نے نیوزی لینڈ کو 2 رنز سے شکست دے دی

ابوظبی: پاکستان نے نیوزی لینڈ کو پہلے ٹی ٹوینٹی میچ میں 2 رنز سے شکست دے دی، کولن منرو کی نصف سنچری بھی کام نہ آسکی، حسن علی نے تین وکٹیں حاصل کیں، محمد حفیظ کو میچ کا بہترین کھلاڑی قرار دیا گیا۔

تفصیلات کے مطابق قومی ٹیم نے نیوزی لینڈ کو پہلے ٹی ٹوینٹی میچ میں 2رنز سے شکست دے دی، حسن علی نے شاندار بولنگ کرتے ہوئے تین وکٹیں حاصل کیں، کولن منرو کی نصف سنچری بھی کام نہ آسکی۔

نیوزی لینڈ نے 149 رنز ہدف کے تعاقب کیا تو پوری ٹیم صرف 146 رنز بناسکی، اوپنر نے اچھا آغاز فراہم کیا، 50 رنز پر نیوزی لینڈ کی پہلی وکت گری، فلپس کو 12 رنز پر حسن علی نے پویلین کی راہ دکھائی۔

کیویز کپتان کین ولیم سن بھی 11 رنز بناسکے، 79 رنز پر نیوزی لینڈ کی تیسری وکٹ گری جب کولن منرو 58 رنز بنا کر آؤٹ ہوئے، گرینڈ ہوم کو 6 رنز پر شاداب خان نے رن آؤٹ کیا۔

کیوی آل راؤنڈر کوری اینڈریسن بھی خاطرہ خواہ کارکردگی دکھانے میں ناکام رہے اور 9 رنز بنا کر پویلین لوٹ گئے، سیفرٹ کو حسن علی نے صفر پر کلی بولڈ کردیا۔

نیوزی لینڈ کے تجربہ کار بلے باز روس ٹیلر کرس پر موجود رہے اور 42 رنز بناسکے، ٹم ساؤتھی نے 5 رنز بنا کر ناقابل شکست رہے۔

گرین شرٹس کی جانب سے حسن علی نے تین جبکہ شاداب خان اور عماد وسیم نے ایک، ایک وکٹ حاصل کی،قومی ٹیم کو تین میچز کی سیریز میں 1-0 کی برتری حاصل ہوگئی۔

قبل ازیں ابوظبی میں جاری پہلے ٹی ٹوینٹی میچ میں قومی ٹیم نے نیوزی لینڈ کو جیت کے لیے  149 رنز کا ہدف دے دیا، محمد حفیظ نے 45 اور سرفراز احمد نے 34 رنز بنائے، ایڈم ملنے نے دو کھلاڑیوں کو پویلین کی راہ دکھائی۔

کپتان سرفراز احمد نے ٹاس جیت کر پہلے بیٹنگ کا فیصلہ کیا، قومی ٹیم کی جانب سے بابر اعظم اور صاحبزادہ فرحان نے اننگز کا آغاز کیا، 8 رنز کے اسکور پر بابر اعظم 7 رنز بنا کر پویلین لوٹ گئے۔

دس رنز کے مجموعی اسکور پر قومی ٹیم کی دوسری وکٹ گری جب صاحبزادہ فرحان 1 رن بنا کر کیچ دے بیٹھے، تیسری وکٹ 77 رنز پر گری پروفیسر محمد حفیظ 36 بالز پر 45 رنز کی شاندار اننگز کھیلی۔

آصف علی 24 اور کپتان سرفراز احمد 34 رنز بنا کر پویلین لوٹ گئے، شعیب ملک کو 8 رنز پر اینڈرسن نے رن آؤٹ کیا، عماد وسیم نے 14 اور فہیم اشرف 10 رنز پر ناقابل شکست رہے۔

نیوزی لینڈ کی جانب سے فاسٹ بولر ایڈم ملنے نے 2 کھلاڑیوں کو پویلین کی راہ دکھائی جبکہ پٹیل، گرینڈ ہوم اور ٹم ساؤتھی ایک وکٹ حاصل کرسکے۔

قبل ازیں نیوزی لینڈ کے خلاف پہلے ٹی ٹوینٹی میچ میں سرفراز احمد نے ٹاس جیت کر پہلے بیٹنگ کا فیصلہ کیا، سرفراز احمد نے کہا کہ نیوزی لینڈ کو اچھا ہدف دینے کی کوشش کریں گے۔

کپتان سرفراز احمد نے کہا کہ قومی ٹیم میں عثمان خان شنواری کی جگہ شاہین آفریدی کو شامل کیا گیا۔

پہلے ٹی ٹوینٹی میچ میں قومی پلیئنگ الیون ان کھلاڑیوں پر مشتمل ہے، کپتان سرفراز احمد، صاحبزادہ فرحان، محمد حفیظ، شعیب ملک، بابراعظم، آصف علی، شاداب خان، فہیم اشرف، حسن علی، شاہین آفریدی۔

Comments

comments

یہ بھی پڑھیں