site
stats
کھیل

وارم اپ میچ، پاکستان نے آسٹریلیا الیون کو دھول چٹادی

برسبین: ایک روزہ میچوں کی سیریز سے قبل کھیلے جانے والے وارم اپ میچ میں پاکستان نے آسٹریلیا الیون کو 196 رنز سے شکست دیدی ہے۔

تفصیلات کے مطابق پاکستان اور کرکٹ آسٹریلیا الیون کے درمیان کھیلے جانے والے میچ میں کرکٹ آسٹریلیا الیون نے ٹاس جیت کر پہلے فیلڈنگ کا فیصلہ کیا جو کافی مہنگا ثابت ہوا۔

قومی کھلاڑیوں نے مقررہ 50 اوورز میں 334 رنز کا مجموعہ اسکور بورڈ پر سجادیا، بابر اعظم صرف 2 رنز کی کمی سے اپنی سنچری مکمل نہ کرسکے جب کہ شرجیل خان اور عمر اکمل نے نصف سنچریاں اور شعیب ملک نے 49 رنز اسکور کیئے، عمر اکمل نے جارحانہ انداز اپناتے ہوئے 54 رنز کی اننگز کھیلی۔

آسٹریلیا الیون کی جانب سے گرین اور تھورنٹون نے تین، تین وکٹیں حاصل کرنے میں کامیاب رہے تاہم کوئی بھی بولر پاکستانی بلے بازوں کو رنز کے ڈھیر لگانے سے نہیں روک سکا۔

335 رنز کے ہدف کے تعاقب میں آسٹریلیا الیون کی پوری ٹیم صرف 138 کے مجموعی اسکور پر ڈھیر ہوگئی اور آسٹریلیا الیون کی جانب سے صرف تین کھلاڑی ہی ڈبل فگر میں داخل ہوسکے۔

صرف جے پی انگلیز ایسے آسٹریلوی کھلاڑی تھے جنہوں نے پاکستانی بولرز کے سامنے کچھ مزاحمت دکھائی اور 70 رنز بنا کر نمایاں رہے، دیگر کوئی بھی بلے باز بھی پاکستانی باؤلر کے سامنے جم کر نہ کھیل سکا، حسن علی نے تین، عماد وسیم اور شعیب ملک نے دو، دو آسٹریلوی کھلاڑیوں کو پویلین کی راہ دکھائی۔

واضح رہے کہ پاکستان اور آسٹریلیا کے درمیان پانچ ون ڈے میچز کی سیریز کا پہلا میچ 13 جنوری کو کھیلا جائے گا۔

Print Friendly, PDF & Email
20

Comments

comments

اس ویب سائیٹ پر موجود تمام تحریری مواد کے جملہ حقوق@2018 اے آروائی نیوز کے نام محفوظ ہیں

To Top