"وطن کی مٹی گواہ رہنا اور ہمارا پرچم یہ پیارا پرچم” یہ وہ ملّی نغمے ہیں جو آج بھی روز اول کی طرح مقبول ہیں۔ ان نغمات کی موسیقی خلیل احمد نے ترتیب دی تھی جن کی آج برسی منائی جارہی ہے۔
21 جولائی 1997 کو پاکستان کے نام ور موسیقار خلیل احمد لاہور میں وفات پاگئے تھے۔
خلیل احمد خاں یوسف زئی کو دنیائے موسیقی میں خلیل احمد کے نام سے پہچانا جاتا تھا۔ 1934 میں گورکھپور میں پیدا ہونے والے خلیل احمد نے آگرہ یونیورسٹی سے گریجویشن کیا، وہ 1952 میں پاکستان آگئے۔
موسیقی کے اسرار و رموز مہدی ظہیر سے سیکھے۔ 1962 میں فلم ’’آنچل‘‘ نمائش کے لیے پیش ہوئی جس کے نغمہ نگار حمایت علی شاعر تھے۔ اس فلم کے نغمات کسی چمن میں رہو تم بہار بن کے رہو، اور کھٹی کڑھی میں مکھی پڑی نے انھیں راتوں رات صفِ اول کا موسیقار بنا دیا۔ خلیل احمد نے اپنے وقت کی مشہور فلموں دامن، خاموش رہو، کنیز، مجاہد، میرے محبوب، آنچ، معصوم، آپ کا خادم، طلاق کے لیے موسیقی ترتیب دی۔
پاکستان ٹیلی وژن پر بچوں کا مقبول ترین پروگرام آنگن آنگن تارے تھا جس کے میزبان خلیل احمد بچوں اور بڑوں سبھی میں مقبول ہوئے۔ انھوں نے ٹیلی وژن کے لیے متعدد نغمات کی موسیقی ترتیب دی۔ ان کی زندگی کے آخری کئی برس گم نامی میں گزرے۔
