The news is by your side.

Advertisement

پاکستانی نوجوان نے 20 ہزار روپے میں شادی کر کے سادگی کی اعلیٰ مثال قائم کردی

لاہور: دنیا میں ہر طرف پرتعیش شادیوں کا شور چل رہا ہے مگر اسی دوران پاکستانی نوجوان نے کم پیسوں میں انتہائی سادہ شادی کر کے ایک نئی تاریخ رقم کردی۔

تفصیلات کے مطابق رضوان نامی نوجوان پیشے کے اعتبار سے فوٹو گرافر ہے جنہوں نے صرف بیس ہزار روپے میں شادی کر کے سب کی توجہ اپنی جانب مبذول کروالی۔

رضوان نے سماجی رابطے کی ویب سائٹ پر شادی کے اخراجات سے متعلق ٹویٹ کیا اور بتایا کہ ’میں نے اپنے ولیمے میں 25 مہمانوں کو مدعو کیا جن میں دوست اور اہلِ خانہ شامل تھے‘۔

نوجوان نے اپنے گھر کی چھت پرولیمے کی تقریب رکھی اور اپنے دوست کے باورچی سے کھانے میں چکن تکہ، سیخ کباب، پتھورے چنے، حلوہ اور اسٹرابیری سے مہمانوں کی تواضع کی۔

رضوان کے مطابق باورچی کو میں نے مسالے خرید کر دیے جبکہ نئی نویلی دلہن نے کھٹے آلو بنائے، چھت کی سجاوٹ کا انتظام والد نے کیا جبکہ تقریب کے لیے پڑوسی سے 25 کرسیاں ادھار لیں۔

ولیمے کی تقریب میں نوبیاہتا جوڑے نے سادے نیلے رنگ کے کپڑے زیب تن کیے جو لڑکے کی والدہ اور بہن نے تحفے میں دیے۔ رضوان نے دیگر نوجوانوں کو مشورہ دیا کہ ’شادی کی تقریب چھوٹی ہو یا بڑی بس خوشی سے خرچہ کرو اور خوش رہو‘۔

نوجوان نے سماجی رابطے کی ویب سائٹ پر اپنی شادی سے متعلق ٹویٹ 23 دسمبر کو کیں جسے سوشل میڈیا صارفین نے بہت زیادہ پسند کیا۔

Comments

comments

یہ بھی پڑھیں