جوہانسبرگ: جنوبی افریقا پہنچنے والی قومی کرکٹ ٹیم کے کھلاڑیوں اور آفیشلز کے کرونا ٹیسٹ کی رپورٹ آگئی۔
پاکستان کرکٹ بورڈ (پی سی بی) کی جانب سے جاری اعلامیے میں بتایا گیا ہے کہ قومی اسکواڈ میں شامل تمام 34 ارکان کے کوویڈ 19 ٹیسٹ کی رپورٹ منفی آئی ہے۔
اعلامیے میں بتایا گیا ہے کہ ان 34 اراکین میں سے 21 کھلاڑی اور 13 ٹیم آفیشلز ہیں۔
پی سی بی کے مطابق کرونا منفی آنے کے بعد قومی اسکواڈ کل سے سپر اسپورٹس پارک سینچورین میں اپنی ٹریننگ کا آغاز کردے گا، جنوبی افریقا کے مقامی وقت کے مطابق 28 مارچ کی دوپہر ڈھائی بجے پہلے ٹریننگ سیشن کا آغاز ہوگا۔
مزید پڑھیں: قسمت نے حسن علی کے روٹی گروپ کو ملا دیا
پاکستان کرکٹ ٹیم دورہ افریقا کے دوران تین ون ڈے اور چار ٹی ٹوئنٹی میچز کھیلے گی، ایک روزہ سیریز کا آغاز 2 اپریل سے ہوگا۔
واضح رہے کہ قومی کرکٹ ٹیم کے کھلاڑی اور آفیشلز گزشتہ روز جوہانسبرگ پہنچے ہیں۔
جنوبی افریقا روانگی سے قبل پاکستان میں بھی قومی کرکٹ ٹیم کے اسکواڈ میں شامل کھلاڑیوں اور آفیشلز کے کرونا ٹیسٹ ہوئے تھے، جو منفی آنے کے بعد قومی ٹیم کو روانگی کی اجازت ملی۔
