اسلام آباد: جرمنی کو پاکستانی برآمدات میں اضافہ ہوا ہے جب کہ درآمدات میں کمی دیکھنے میں آئی۔
تفصیلات کے مطابق جرمنی کو پاکستان کے تجارت کے حجم میں جاری مالی سال کے پہلے 6 ماہ میں اضافہ ریکارڈ ہوا ہے، جب کہ درآمدات میں کمی دیکھنے میں آئی ہے۔
اسٹیٹ بینک کی جانب سے اس حوالے سے جاری کردہ اعداد و شمار کے مطابق جاری مالی سال کے پہلے 6 ماہ جرمنی کو پاکستان کی برآمدات کا حجم 881.04 ملین ڈالر ریکارڈ کیا گیا جو گزشتہ مالی سال کی اسی مدت کے مقابلے میں 1.94 فی صد زیادہ ہے۔
گزشتہ مالی سال کی اسی مدت میں جرمنی کو برآمدات سے ملک کو 864.24 ملین ڈالر کا زرمبادلہ حاصل ہوا تھا۔
دسمبر میں جرمنی کو پاکستانی برآمدات کا حجم 135.13 ملین ڈالر ریکارڈ کیا گیا، جو نومبر میں 139.46 ملین ڈالر اور دسمبر2021 میں 172.98 ملین ڈالر تھا۔
مالی سال 2022 میں جرمنی کو 1.749 ارب ڈالر مالیت کی برآمدات ریکارڈ کی گئی تھیں۔
اعداد و شمار کے مطابق جاری مالی سال کے پہلے 6 ماہ میں جرمنی سے درآمدات میں سالانہ بنیادوں پر 31.52 فی صد کی کمی ریکارڈ کی گئی ہے، جولائی سے دسمبر 2022 تک کی مدت میں جرمنی سے درآمدات کا حجم 476.68 ملین ڈالر ریکارڈ کیا گیا، جو گزشتہ مالی سال کی اسی مدت میں 626.96 ملین ڈالر تھا۔
دسمبر 2022 میں جرمنی سے درآمدات کا حجم 76.71 ملین ڈالر تھا، جو نومبر میں 73.31 ملین ڈالر اور دسمبر 2021 میں 116.84 ملین ڈالر تھا، مالی سال 2022 میں جرمنی سے 1.250 ارب ڈالر کی درآمدات ریکارڈ کی گئی تھیں۔
