The news is by your side.

Advertisement

وزیردفاع کی متحدہ عرب امارات کی مسلح افواج کو تربیتی سہولتوں کی فراہمی کی پیش کش

اسلام آباد : وفاقی وزیر دفاع انجینئر خرم دستگیر نے پاکستان میں متحدہ عرب امارات کے نو متعین سفیر حماد عبیدابراہیم سالم الزابی  کو  یو اے ای کی مسلح افواج کو تربیتی سہولتوں کی فراہمی کی پیش کش کردی۔

تفصیلات کے مطابق وفاقی وزیر دفاع انجینئر خرم دستگیر خان سے پاکستان میں متحدہ عرب امارات کے نو متعین سفیر حماد عبیدابراہیم سالم الزابی نے ملاقات کی، ملاقات میں وفاقی وزیر دفاع نے تقرری کے بعد ذمہ داری سنبھالنے پر سفیر کے لیے نیک خواہشات کا اظہار کیا۔

ترجمان وزارت دفاع کے مطابق ملاقات کے دوران دونوں ممالک کے درمیان موجودہ اشتراک کارپراطمینان کا اظہار کیا گیا اور باہمی طورپر دفاعی تعاون مزید بڑھانے پر بھی اتفاق کیا گیا۔

اس موقع پر وفاقی وزیر نے خاص طورپر دفاعی صنعت میں اشتراک کار بڑھانے کی تجویز پیش کی، اس کے علاوہ متحدہ عرب امارات کی مسلح افواج کو تربیتی سہولتوں کی فراہمی کی پیش کش بھی کی۔

ترجمان کے مطابق وزیر دفاع نے اس توقع کا اظہار کیا کہ ان کے دورِ سفارت میں پاکستان اور متحدہ عرب امارات کے دوستانہ تعلقات مزید مضبوط ہوں گے۔

نو متعین سفیر حماد ابراہیم سالم الزابی نے پاکستان میں سفارتی ذمہ داریاں ملنے پر خوشی کا اظہار کرتے ہوئے کہا کہ وہ پاکستان کے ساتھ پہلے سے موجودہ دوستانہ خوشگوار اور قریبی تعلقات کو مزید مضبوط بنانے کے لیے اپنی صلاحیتوں اور عہدے کو بروئے کار لائیں گے۔

وفاقی وزیر دفاع نے متحدہ عرب امارات کی ترقی اور خوشحالی کے لیے صدر خلیفہ بن زائد النہیان کی کوششوں اور ویژن کو سراہا جوکہ متحدہ عرب امارات کی مسلح افواج کے سپریم کمانڈر بھی ہیں۔

انہوں نے کہا کہ پاکستان اور متحدہ عرب امارات قابل قدرسٹریٹجک پارٹنرز رہیں گے اور اعلیٰ سطحی رابطوں سے دوطرفہ مثالی تعلقات میں مزید تیزی آئے گی۔


خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پرشیئرکریں۔

Comments

comments

یہ بھی پڑھیں