لندن : بکھنگم پیلس میں ملکہ برطانیہ پاکستانی طالب علم سیدفیضان حسین کو کوئنزینگ لیڈرز ایوارڈ سے نوازیں گی۔
تفصیلات کے مطابق پاکستانی طالب علم سید فیضان حسین نے کوئینز ینگ لیڈر ایوارڈ 2017 اپنے نام کیا ، جس کے بعد ملکہ برطانیہ فیضان حسین کو ایوارڈ سے نوازیں گی۔
سید فیضان حسین کو کمپیوٹر سائنس اور میڈیکل میں کارکردگی پر ایوارڈ دیا جائیگا۔
ملکہ برطانیہ کی جانب سے فیضان کے علاوہ 60 پاکستانیوں کو بھی ایوارڈ سے نوازا جائے گا ۔
کوئینز ینگ لیڈر ایوارڈ کی ویب سائٹ کے مطابق سید فیضان حسین نے سماجی ادارے سیلانی ویلفیئرٹرسٹ کے ذریعے ٹیکنالوجی کی مدد سے رضاکارانہ طور پر دو سو سے زائد غریب اور محروم طلبہ کو کمپیوٹر کی تعلیم سے روشناس کروایا۔
فیضان نے اپنی صلاحیتوں کو استعمال کرتے ہوئے بول چال سے محروم افراد کیلئے ایجوایڈ نامی ایپ ڈیزائن کیا، جس کی مدد سے اشاروں کی زبان کو سننا ممکن ہوگا، اس کے علاوہ بیماریوں پر کڑی نظر رکھنے کے لیے ون ہیلتھ نامی سسٹم تیارکیا ، جس کی مدد سے موزی امراض پھیلنے سے متعلق آگاہی فراہم کی جاسکتی ہے۔
خیال رہے کہ ملکہ برطانیہ ہر سال دنیا بھر سے منتخب نوجوانوں کو ایوارڈ سے نوازتی ہیں، کوئینز ینگ لیڈر کے تحت 18 سے 29 سال کے ایسے نوجوانوں کی حوصلہ افزائی کی جاتی ہے، جو اپنی قائدانہ صلاحیتوں کی وجہ سے خود کو منواتے ہیں۔
اس پروگرام کا آغاز 2014 میں کوئین الزبتھ ڈائمنڈ جوبلی ٹرسٹ نے کامن ریلیف اور رائل کامن ویلتھ سوسائٹی کی شراکت سے کیا گیا تھا۔
