نیویارک :اقوام متحدہ میں پاکستانی اسٹریٹ فوڈ اور ٹرک آرٹ کی نمائش کا اہتمام کیا گیا جس میں نمائندوں اور سفارت کاروں نے کثیر تعداد میں شرکت کی۔
میڈیا رپورٹس کے مطابق پاکستانی اسٹریٹ فوڈ اور ٹرک آرٹ کی نمائش میں اقوام متحدہ کے اعلیٰ حکام سمیت مختلف ممالک کے سفارت کاروں اور سفیروں نے شرکت کی اور ٹرک آرٹ کو ایک فن قرار دیا ۔
اس موقع پر شرکاءکا کہنا تھا کہ پاکستانی ٹرک آرٹ نہ صرف دنیا بھرمیں اپنی الگ پہچان رکھتا ہے بلکہ پاکستان کی مثبت اور پر امن تصویر بھی پیش کرتا ہے۔اقوام متحدہ میں پاکستان کی مستقل مندوب ملیحہ لودھی نے کہا ہے کہ یہ اپنے کلچر کو فروغ دینے کا بہترین پلیٹ فارم ہے۔
انہوں نے مزید کہا کہ ایسی تقریبات سے بیرون ملک لوگوں کو پاکستانی ثقافت سے روشناس کروانے میں مدد ملتی ہے۔اقوام متحدہ میں پاکستانی اسٹریٹ فوڈ اور ٹرک آرٹ کی نمائش کی تقریب میں پرتگال ، اومان اور کرغزستان کے سفیروں نے شرکت کی اورتقریب کی رونقیں بڑھا دیں۔
پاکستانی اسٹریٹ فوڈ کی نمائش میں بڑے پیمانے پرآنے والے شرکاءکےلئے پاکستانی دیسی فوڈ میں شامل سموسہ ، نمک پارے ، بن کباب وغیرہ کا اہتمام کیا گیا تھا ۔
