اسلام آباد: سابق معروف قانون دان شہزاد اکبر نے کہا ہے کہ پاکستان کرپشن کے خلاف جنگ لڑ رہا ہے، کرپشن کے خلاف یہ جنگ دراصل استحصالی سیاسی نظام کے خلاف جنگ ہے۔
تفصیلات کے مطابق وزیر اعظم کے معاون خصوصی برائے احتساب نے ٹویٹ کے ذریعے کہا ہے کہ پاکستان کی کرپشن کے خلاف جنگ دراصل اس سیاسی نظام کے خلاف ہے جو عوام کو نچوڑ لیتا ہے۔
شہزاد اکبر نے انٹرنیشنل اینٹی کرپشن ڈے پر اپنے ٹویٹ میں لکھا ’کرپشن کے خلاف پاکستان کی جنگ حقیقتاً ایک جدوجہد ہے نچوڑ لینے والے سیاسی نظام کے خلاف، یہ ایکسٹریکٹو پالیٹکل سسٹم مافیاز کو عوام سے سیاست چھیننے، ان کے وسائل اور ان کا مستقبل چوری کرنے کی طاقت فراہم کرتا ہے۔‘
Pakistan’s fight against corruption is actually a struggle against extractive political system which enables #Mafias in garb of politics stealing from people their resources and future. #InternationalAntiCorruptionDay @PTIofficial
— Mirza Shahzad Akbar (@ShazadAkbar) December 9, 2019
خیال رہے کہ آج دنیا بھر میں ’بین الاقوامی یوم انسداد بد عنوانی‘ منایا جا رہا ہے، پاکستان میں بھی اس سلسلے میں تقریبات کا انعقاد کیا گیا، اسلام آباد میں خصوصی تقریب منعقد کی گئی جس سے چیئرمین نیب جسٹس ریٹائرڈ جاوید اقبال نے خطاب کیا، جب کہ کراچی میں بھی واک کا اہتمام کیا گیا۔
بین الاقوامی دن کی مناسبت سے ڈپٹی چیئرمین نیب حسین اصغر نے بھی میڈیا سے گفتگو کرتے ہوئے کہا کہ سال بھر میں جو پرفارمنس ہم نے دی وہ مشعل راہ ہے، انٹر نیشنل انڈکس کے مطابق پاکستان میں کرپشن کم ہوئی ہے۔
