ٹوکیو: پاکستان کے شاہ حسین شاہ کو جوڈو مقابلے کی 100 کلوگرام کیٹیگری میں شکست کا سامنا کرنا پڑا ہے۔
ٹوکیو اولمپکس دوہزار بیس کے مقابلے جاری ہیں، ویٹ لفٹنگ، بیڈمنٹن اور سوئمنگ کے بعد جوڈو میں بھی پاکستانی ایتھلیٹ ناکام ہوئے۔
شاہ حسین شاہ کی ٹوکیو اولمپکس میں مصر کے رمضان درویش کے ساتھ پہلی فائٹ تھی، مصری ایتھلیٹ نے تین منٹ اور نو سیکنڈز میں کامیابی حاصل کرتے ہوئے شاہ حسین شاہ کو ٹورنامنٹ سےباہر کردیا۔
یوں طلحہ،ماحور کے بعد شاہ حسین کا بھی اولمپکس میں سفر ختم ہوگیا۔
شاہ حسین شاہ سیئول اولمپکس میں پاکستان کے لیے آخری مرتبہ 1988 میں انفرادی اولمپکس میڈل جیتنے والے باکسرحسین شاہ کے بیٹے ہیں،ان کے والد شاہ حسین کے میڈل جیتنے کے بعد اب تک پاکستان نے اولمپکس میں کوئی انفرادی میڈل حاصل نہیں کیا۔
یہ بھی پڑھیں: ویٹ لفٹر طلحہ طالب کی ویڈیو پر ماہرہ خان کا دلچسپ ٹوئٹ
شاہ حسین شاہ نے جوڈو مقابلوں میں پاکستان کی نمائندگی کرنے کے ساتھ ٹوکیو اولمپک 2021 کی افتتاحی تقریب میں پاکستانی پرچم کے ساتھ پاکستانی دستے کی قیادت بھی کی تھی، اس سے قبل وہ ریو اولمپکس میں بھی پاکستان کی نمائندگی کر چکے ہیں۔
انہوں نے دو ہزار چودہ میں گلاسگو میں ہونے والے کامن ویلتھ گیمز میں چاندی کا تمغہ جیتا تھا۔ اس کے علاوہ شاہ حسین شاہ دو مرتبہ ساؤتھ ایشین گیمز میں طلائی تمغے جیت چکے ہیں۔
