لاہور: آسٹریلیا کرکٹ ٹیم کے کپتان پیٹ کمنز کا کہنا ہے کہ ہم اب زیادہ چانسز ضائع کرنے کے متحمل نہیں ہوسکتے،کراچی میں ہمارے پاس جیتنے کا موقع تھا مگر فائدہ نہ اٹھا سکے۔
تفصیلات کے مطابق آن لائن پریس کانفرنس کرتے ہوئے کپتان آسٹریلیا کرکٹ ٹیم پیٹ کمنز نے کہا کہ کراچی ٹیسٹ کے اسکواڈ کے ساتھ ہی لاہور ٹیسٹ میں اتریں گے، کئی آپشنز پر غور کیا مگر ہم سمجھتے ہیں کہ یہی الیون بہتر ہے۔
پیٹ کمنز نے کہا کہ پچ پرگراس نہیں ، ریورس سوئنگ کا کردار اہم ہو گا، یہ بڑا میچ ہےاور فاسٹ بولرز کیلئے موسم بہت گرم ہے، ان کنڈیشنز میں کھیلنے کا زیادہ تجربہ نہیں ہے، ہمیں فیلڈنگ میں کم سے کم غلطیاں کرنا ہوگی۔
آسٹریلوی کپتان نے اعتراف کیا کہ کراچی میں ہمارے پاس جیتنے کا موقع تھا مگرفائدہ نہ اٹھا سکے کوشش ہوگی کہ لاہور میں عمدہ کارکردگی دکھائیں۔
انہوں نے کہا کہ لاہور میں پی ایس ایل کے دوران زیادہ میچز ہوئے ہیں اس لئے پچز ایسی ہیں، بابر اعظم کراچی میں غیر معمولی اننگز کھیلے ہم نے ان کے لئے پلانز بنائے اب انہی پلانز پر کام کریں گے۔
ان کا مزید کہنا تھا کہ بابر نے اچھی لمبی اننگز کھیلی، پاکستان ٹیم بھی اچھا کھیلی اور ڈیڈ پچز کا بھی عمل دخل ہے۔
