مقبوضہ بیت المقدس: مسجد اقصی کے کمپاؤنڈ میں تیسرے روز بھی اسرائیلی فورسز اور فلسطینیوں میں جھڑپیں جاری ہیں، اسرائیلی فورسز کے لاٹھی چارج سے متعدد فلسطینی زخمی ہوگئے ہپں۔
صیہونی فورسز مسجد کے احاطے میں داخل ہوکر گولیاں برسائیں گرنیڈ بھی پھینکے، مسجد اقصیٰ میں اسرائیلی فورسز کے گھسنے کی کوشش پر فلسطینیوں سے جھڑپ چھڑگئی اس دوران مسجد کا احاطہ دھماکوں سے گونج اٹھا۔
اسرائیلی فورسز آنسو گیس اور کریکر استعمال کرتے ہوئے مسجد کے احاطے میں داخل ہوگئیں ۔ مسجد دھماکوں سے گونج اٹھی اور اندر لوگ ادھر ادھر بھاگتے ہوئے نظر آئے ۔
اسرائیلی فورسز کی اشتعال انگیزی ایسے وقت میں دیکھنے میں آئی جب یہودیوں کے سال نو کی تقریبات میں چند گھنٹے باقی رہ گئے تھے، اسرائیلی فوج نے کارروائی کے بعد مسجد کو نمازیوں کےلیے بند کردیا۔
رواں سال جولائی میں بھی یہودیوں کے داخلے کی کوشش پر مسجد اقصیٰ میں جھڑپیں ہوئی تھیں۔
بیت المقدس فلسطینیوں اور اسرائیل کے درمیان مذہبی اور سیاسی تنازع کا باعث ہے اور اس حوالے سے پرتشدد واقعات ہوتے رہتے ہیں۔
یہاں گذشتہ ہفتے اس وقت کشیدگی میں اضافہ ہو گيا تھا جب اسرائیل کے وزیرِ دفاع موشے یالون نے دو مسلم گروہوں پر پابندی لگا دی، جو احاطے میں یہودیوں کے داخلے کے خلاف تھے۔
یہودیوں کے نئے سال کا آغاز اتوار کو سورج غروب ہونے کے وقت سے شروع ہو رہا ہے اور منگل کی شام تک جاری رہے گا۔
