واشنگٹن: امریکا کی جانب سے فلسطینیوں کے حوالے سے سیاسی بلیک میلنگ کا سلسلہ جاری ہے، امریکی حکومت نے فلسطینیوں کی 20 کروڑ ڈالر کی امداد منسوخ کردی۔
غیرملکی خبررساں ادارے کے مطابق امریکی حکومت نے فلسطینی علاقوں غرب اردن اور غزہ کے لیے مختص 20 کروڑ ڈالر کی امداد دوسرے ملکوں میں جاری امدادی پروگراموں کو دینے کا اعلان کیا ہے۔
امریکی وزارت خارجہ کے عہدیدار کا کہنا ہے کہ غزہ اور غرب اردن کے لیے مختص کی گئی 200 ملین ڈالر کی اقتصادی امداد دنیا کے دوسرے علاقوں میں جاری پروگراموں کو دینے کی ہدایات کی جارہی ہیں۔
امریکی عہدیدار نے کہا کہ ہم نے فلسطین اتھارٹی کی غزہ اور غرب اردن کے لیے امداد پر نظرثانی شروع کی ہے، ہم امدادی رقم وہاں خرچ کریں گے جہاں امریکی ٹیکسوں کے لیے فائدہ ہو اور امریکی قومی سلامتی مل سکے۔
دوسری جانب فلسطینی اتھارٹی نے امریکا کی جانب سے امداد روکے جانے کی مذمت کرتے ہوئے اسے سیاسی بلیک میلنگ قرار دیا ہے۔
امریکا میں فلسطینی سفیر نے کہا ہے کہ امریکی انتظامیہ نے خود کو امن دشمن ثابت کیا ہے، فلسطینیوں کی امداد روکنے کا کوئی قانونی اور اخلاقی جواز نہیں ہے۔
واضح رہے کہ فلسطینی اتھارٹی اور امریکا کے درمیان گزشتہ برس 6 دسمبر کو اس وقت حالات کشیدہ ہوگئے تھے جب امریکا نے بیت المقدس کو اسرائیل کا دارالحکومت تسلیم کرتے ہوئے فلسطینی اتھارٹی پر مالی دباؤ بڑھانے کی پالیسی اپنائی تھی۔
