غیر ملکی فنڈنگ کیس: الیکشن کمیشن کے دائرہ اختیار کے خلاف درخواست مسترد -
The news is by your side.

Advertisement

غیر ملکی فنڈنگ کیس: الیکشن کمیشن کے دائرہ اختیار کے خلاف درخواست مسترد

اسلام آباد: وفاقی دارالحکومت اسلام آباد کی ہائیکورٹ میں پاکستان تحریک انصاف کی غیر ملکی فنڈنگ کیس میں عدالت نے الیکشن کمیشن کے دائرہ اختیار کے خلاف پی ٹی آئی کی استدعا اور حکم امتناع کی استدعا بھی مسترد کردی۔

تفصیلات کے مطابق اسلام آباد ہائی کورٹ کے جسٹس محسن اختر کیانی نے پاکستان تحریک انصاف کے خلاف غیر ملکی فنڈنگ کیس میں الیکشن کمیشن کے دائرہ اختیار کے خلاف تحریک انصاف کی درخواست پر سماعت کی۔

تحریک انصاف کی جانب سے اسلام آباد ہائیکورٹ میں دائر درخواست میں مؤقف اپنایا گیا کہ غیر ملکی فنڈنگ کیس سننا الیکشن کمیشن کا دائرہ اختیار نہیں ہے۔ لہٰذا عدالت عالیہ الیکشن کمیشن کو اس کیس کی سماعت سے روکے۔

ہائیکورٹ کے جج جسٹس محسن اختر کیانی نے تحریک انصاف کی استدعا مسترد کرتے ہوئے کہا کہ کیس سنہ 2014 سے چل رہا ہے جبکہ ہائی کورٹ پہلے بھی یہ کیس الیکشن کمیشن کو واپس بھیج چکی ہے۔

عدالت نے الیکشن کمیشن اور اکبر ایس بابر کو نوٹس جاری کرتے ہوئے فریقین کو جواب جمع کروانے کا حکم دیا ہے۔

اسلام آباد ہائیکورٹ نے رجسٹرار آفس کی جانب سے تحریک انصاف کی درخواست پر عائد اعتراض کو دور کرتے ہوئے کیس کی سماعت کو غیر معینہ مدت تک ملتوی کردیا۔


Comments

comments

یہ بھی پڑھیں