عمران خان نے پہلی ناکامی سے سبق نہیں سیکھا، پرویز رشید -
The news is by your side.

Advertisement

عمران خان نے پہلی ناکامی سے سبق نہیں سیکھا، پرویز رشید

اسلام آباد : وفاقی وزیر اطلاعا ت و نشریا ت پرویز رشید کاکہنا ہے کہ عمران خان اگر پاکستان کی ترقی کی راہ میں رکاوٹ کا کوئی منصوبہ بنا رہے ہیں تو اس میں بھی انھیں دھرنا سیاست کی طرح ناکامی ہو گی ۔

عمران خان نے پہلی ناکامی سے سبق نہیں سیکھا اور اب دوسری ناکامی کیلئے دوبارہ احتجاجی تحریک کا اعلان کیا ہے ۔ پرویزرشید کاکہناتھا کہ پی آئی اے میں پی ٹی آئی کے پارٹنرز احتجاج کی سیاست کررہے ہیں.

ملازمین کا احتجاج سیاسی کھیل کا حصہ ہے جس کا مقصد پاکستان کو عدم استحکام کا شکار کرنا ہے۔ اسلام آباد میں پریس کانفرنس سے خطاب میں ان کا کہنا تھا کہ پی آئی اے معاملے پر نعشوں کی سیاست کی جارہی ہے.

پولیس اور رینجر کہہ رہی ہے کہ انہوں نے گولی نہیں چلائی یہ دیکھنا ہو گا کہ جلوس کے اندر سے گولی کس نے چلائی سندھ حکومت کی ذمہ داری ہے کہ اس کی تحقیقات کی جائیں ۔پرویز رشید کاکہناتھا کہ عمران خان کو اپنا منشور بھی یاد نہیں جس میں پی آئی اے سمیت قومی خزانے پر بوجھ اداروں کی نجکاری کا ذکر کیا گیا ہے ۔

عمران خان قوم کو بتائیں گے کہ کیا انہوں نے اپنے منشور میں لکھا تھا کہ وہ دھرنا دیں گے ، ہرتین ماہ بعد حکومت کے خلاف احتجاجی تحریک چلائیں گے اور کنٹینر ون اور کنٹینر ٹو کی سیاست چلائیں گے۔

پرویز رشید کاکہناتھاکہ جنوبی ایشیاءمیں پاکستان وہ ملک ہے جہاں پیٹرولیم مصنوعات کی قیمت سب سے کم ہے یہ بات عمران خان کے ایڈوائز ر انہیں نہیں بتاتے۔

ان کاکہناتھاکہ عمران خان کو بتانا چاہتا ہوں کہ بھارت میں پیٹرول 97 روپے ، نیپال میں 95 ، سری لنکا میں 93 ، بنگلہ دیش میں 125 روپے جبکہ ان کے مقابلے میں پاکستان میں پیٹرول 70 روپے فی لیٹر ہے ۔

وفاقی حکومت ٹیکس اکٹھا کر کے 62 فیصد صوبوں کو دے دیتی ہے عمران خان اگر چاہیں تو ان پیسوں میں سے لوگوں کو مفت پیٹرول ڈلوا دیں۔

خان صاحب پیٹرول کی قیمت کم کرنے کی بات کرتے ہیں مگر اپنے صوبے میں ٹرانسپورٹ کرایوں میں کمی نہیں کروا سکے۔

Comments

comments

یہ بھی پڑھیں