تہران : ایران میں ایک اور طیارہ رن وے سے پھسل گیا ، طیارے میں110مسافر سوار تھے، چند روز قبل بھی مسافر طیارے کے پائلٹ نے رن وے سے متصل سڑک پر ایمرجنسی لینڈنگ کی تھی۔
تفصیلات کے مطابق ایران کے مغربی علاقے میں طیارہ رن وے سے پھسل گیا تاہم حادثے سے محفوظ رہا، طیارہ برفباری کے باعث رن وے سے پھسلا، طیارے میں110مسافرسوار تھے۔
یاد رہے چند روز قبل ایرانی مسافر طیارے کے پائلٹ نے رن وے سے متصل سڑک پر ایمرجنسی لینڈگ کردی، طیارے میں تقریباً 150 مسافر سوار تھے، طیارے کے لینڈنگ گیئر میں خرابی کے سبب پائلٹ کو مجبورآ طیارہ سڑک پر اتارنا پڑا تھا۔
مزید پڑھیں : ایرانی پائلٹ نے مسافر طیارے کو سڑک پر اتار دیا، ویڈیو وائرل
اس واقعے کی ویڈیو سوشل میڈیا پر بھی وائرل ہوئی تھی، جس میں مسافروں کو افراتفری کے عالم میں سیڑھی کے بغیر براہ راست جہاز سے اترتے ہوئے دیکھا جا سکتا تھا۔
واضح رہے 8 جنوری کو ایران کی فضائی حدود میں یوکرینی مسافر طیارہ گر کر تباہ ہوگیا تھا ،جس میں سوار 176 مسافر موقع پر ہی ہلاک ہوگئے تھے، اس جہاز میں کینیڈا سے تعلق رکھنے والے 62 مسافر سوار تھے۔
امریکا، کینیڈا، برطانیہ سمیت دیگر ممالک نے گزشتہ روز الزام عائد کیا تھا کہ ایران نے طیارے کو میزائل سے نشانہ بنایا، جس پر ایرانی حکام نے الزام کو بے بنیاد قرار دیا تھا۔
بعد ازاں ایرانی ایرواسپیس کمانڈر علی حاجی زادے نے یوکرین طیارےکی تباہی کی ذمےداری قبول کرتے ہوئے اعتراف کیا کہ ’جہاز کو غلطی سے نشانہ بنایا گیا کیونکہ سیکیورٹی حکام اُسے کروز میزائل سمجھ بیٹھے تھے۔
