نئی دہلی: بالی ووڈ کے کنگ شاہ رخ خان کی 4 سال بعد ریلیز ہونے والی فلم پٹھان نے بھارت میں تہلکہ مچانے کے بعد امریکی شائقین کو بھی اپنے سحر میں جکڑ لیا اور تمام انگریزی فلموں کو پیچھے چھوڑ دیا۔
بالی ووڈ کنگ شاہ رخ خان کی ایکشن سے بھرپور فلم پٹھان نے امریکی باکس آفس پر بھی شاندار کامیابی حاصل کرلی۔
بھارتی میڈیا رپورٹ کے مطابق پٹھان امریکی باکس آفس پر راج کر رہی ہے، اس فلم نے امریکا میں اکیڈمی ایوارڈز کے لیے نامزد تمام بہترین فلموں کو پیچھے چھوڑ دیا ہے۔
اسپائی تھرلر فلم پٹھان نے امریکا میں 10 ملین ڈالرز کا بزنس کرنے کے بعد فلم دی بنشیز آف انشیرین، ٹار، ٹرائینگل آف سیڈنیس، اور وومن ٹاکنگ پر برتری حاصل کرلی ہے۔
فلم کی اس شاندار کامیابی پر شاہ رخ خان کا کہنا ہے کہ یہ ایک ناقابل یقین تجربہ ہے، شاید اب ہم خدا کے زیادہ شکر گزار ہوں گے کیونکہ ایسے وقت بھی آئے جب ہمیں لوگوں کو فون کرنا پڑا کہ وہ آسانی سے فلم ریلیز کروائیں اور انہوں نے ایسا ہی کیا۔
انہوں نے کہا کہ میں چاہتا ہوں کہ میری فلمیں ہمیشہ پیار محبت سے ریلیز ہوں، کوئی ہنگامہ آرائی نہ ہو۔
خیال رہے کہ پٹھان ریلیز کے 9 دن میں صرف بھارتی باکس آفس پر 300 کروڑ سے زیادہ کا بزنس کرچکی ہے جبکہ دنیا بھر سے اس فلم کی مجموعی باکس آفس کلیکشن 700 کروڑ بھارتی روپے ہے۔
