قرنطینہ سے فرار بھارتی شہری نے عمر رسیدہ خاتون کو کاٹ لیا
نئی دہلی : کرونا وائرس کے مریض نے قرنطینہ سے بھاگ کر عمر رسیدہ خاتون کو قتل کردیا، قاتل کو گھر میں قرنطینہ کیا ہوا تھا۔
غیر ملکی خبر رساں ادارے کی رپورٹ کے مطابق بھارتی ریاست تامل ناڈو میں یہ افسوس ناک اور حیران کن واقعہ پیش آیا جہاں گھر میں قرنطینہ کیے گئے مریض نے فرار ہوکر خاتون کو کاٹ لیا، جو خاتون کو موت کے منہ میں لےگیا۔
پولیس کا کہنا ہے کہ قاتل 35 سالہ مانی کندن ہے جو کچھ روز قبل ہی سری لنکا سے بھارت پہنچا تھا، مذکورہ شخص کو گھر میں ہی قرنطینہ کیا ہوا کہ ایک دن اچانک وہ برہنہ حالت میں گھر کی چھت سے نیچے کود گیا۔
ملزم نے چھت سے کودتے ہی گھر کے باہر بیٹھی ہوئی 80 سالہ خاتون کو کاٹ لیا،حادثے کے دوران خاتون کو گردن پر زخم آیا، انہیں فوری طور پر اسپتال منتقل کیا گیا تاہم وہ جانبر نہ ہوسکی۔
پولیس کا کہنا ہے کہ قاتل کا دماغی توازن ٹھیک نہیں ہے اسے 2010 میں دماغی اسپتال میں بھی داخل کرایا گیا تھا تاکہ اس کا علاج کیا جاسکے۔
مذکورہ شخص کے اہل خانہ کے مطابق ملزم کی دماغی حالت کاروبار میں نقصان کے باعث خراب ہوگئی ہے۔ پولیس نے ملزم کو گرفتار کرکے قتل اور اقدام قتل کا مقدمہ درج کرلیا۔
